Sheffield boss thar chu Watford boss hlui

Premier League aṭanga tla hlim Sheffield United chuan coach thar atan Watford leh Fulham boss hlui Slavisa Jokanovic an lalut a, kum thum chhung atan contract an ziahpui.

Kum 52 mi coach hian Qatari club Al-Gharafa a enkawl mek a, mahse, Sheffield an lo lan takah chuan nakkuma World Cup thleng tur ram club hi kalsan a thlang ta zawk a ni.

Sheffield hian March thla khan an coach Chris Wilder chu a hna aṭangin an chawlhtir a, kum 53 mi Wilder hian May 2016 aṭang khan League One club an nih lai aṭangin a enkawl ṭan a, Premier League a hruai thleng thei a ni.

Serbian coach Jokanovic hi coach langsar tak ni lo mah se Championship 'level' a club enkawl tur chuan ani aia duhthlan tur an awm chuang lo - Watford leh Fulham chu Premier League-a lo hruai thleng tawh a, Sheffield pawhin English top flight league-a kir lehnghal hi an beisei ang.

Bramall Lane (Sheffield khelmual) a ram pawn coach hmasa ber Jokanovic chuan, "Sulhnu nei ṭha em club-a coach ka ni thei tur hi ka lawm takzet. English football-a ka lo kir leh thei hi ka lawm a, player leh staff-te nena bul ṭan ka chak tawh a, fan-te nena inhmuh pawh a châkawm tawh khawp mai.

"Kan fan-te hnena ka tiam duh chu, he team hian a tum ramte a thlen theih nan kan theihna zawng zawng kan hlan dawn a ni tih hi a ni," a ti a, a phur hle.