Liverpool-in Konate an hnaih zel
Premier League club Liverpool chuan RB Leipzig centre back Ibrahima Konate an lalut hnai tawh a, he thuziak i chhiar meuh chuan an in lalut fel tawh hial mai thei.
Kum 22 mi defender hi season tawp hma aṭang tawh khan Reds nen hian sawizawm an ni a, inbiakna pawh thui tak kalpui a ni tawh.
French defender hian a contract-ah pound maktaduai 35-a leichhuah a nih theihna dan a ziak tel a, Merseyside club hian heti zat sum thehchhuah hi an inhuam niin a lang.
Liverpool hian Schalke 04 aṭanga loan-a an hawh mek Ozan Kabak chu an duh chuan a nghetin an lalut thei a, mahse, pound maktaduai 18 man centre back lak ngheh ai chuan Konate lakluh an thlang zawk.
Tun season Champions League last 16-ah khan Reds hi RB Leipzig nen an intawng a, Liverpool hian inkhel pahnih belhkhawmah 4-0 in hnehna an chang - Konate erawh match hnihah a inlan lo ve ve.
Turkey international Kabak hi a ngheta lakluh an tum loh thu an hrilh chiang tawh a, January-a loan hmanga an hawh defender hian club dang nen inbiakna a kalpui mek. Kabak hian Reds tan match 13-a khel hman a, mahse, April 24-a Newcastle United laka a inhliam hnuah erawh a inlan leh tawh lo.
Liverpool hian season tluan deuhthawin hliam vangin Virgil van Dijk, Joe Gomez leh Joel Matip-te an chhawr mumal thei lo a, Fabinho leh Jordan Henderson-ten centre back-a khelh chang an nei nual.
Season tawp lamah erawh tawnhriat nei tlem defender pahnih Nathaniel Phillips leh Rhys Williams-te chhawrin an tifuh viau a, Konate an neih belh bawk chuan tlarhnung lamah chuan an thaw a veng huai ang.
Tun season Champions League last 16 aṭang khan Reds hian RB Leipzig hi inkhel pahnih belhkhawmah 4-0 in an hneh a, Konate erawh match hnihah a inlan lo ve ve - season hman zawh takah khan Leipzig tan inelna hrang hrangah match 21-a khel.