An ramah Djokovic a champion

Novak Djokovic chuan French Open inbuat­saihna a nei ṭha hle. Inrinni zan khan Belgrade Open final-ah Alex Molcan chu darkar khat leh minute 28 chhungin 6-4, 6-3 a hnehin a champion a, clay court chhungah title a la.

Serbian tlangval hian an rama inelna neihah mipui lawm a hlawh hle a, world number 255 Molcan a hneh hnu hian a hmuna inkhel entute chuan ding chungin zahna chibai an buk.

Kum 34 mi Djokovic chuan, "He hmunah hian kum 10 hnua a vawi khat nan nomawi ka chawi leh ta, a hlut dan a dangdai hle. Ka khel ṭhain tihsual pawh ka nei tlem a, hei hi Roland Garros atana inbuatsaihna ṭha tak chu a ni," tiin a sawi.

World number 1 hian tunah chuan inringtawk takin French Open a khel thei ang. Clay court inelna liana a match hmasa ber atan vawiin hian Tennys Sandgren a hmachhawn dawn a, chak tura rinkai a ni.