Miami Heat hnehin Bucks an tlang

Milwaukee Bucks chuan nimin zing khan Miami Heat lakah 120-103 in hnehna an chang a, Eastern Conference playoff khelh laiah best of seven series chu 4-0 in an la a, conference semi-final an lut.

Season hmasa khan NBA Finals-ah Bucks hian Los Angeles Lakers an ngam lo, kuminah champion ngei tumin thapui an thawh leh a, inrintawkna an nei sang rih hle - hmabak paltlang tur erawh a la hautak dawn.

Bucks an thiam
NBA regular season-ah Milwaukee Bucks an hmuhnawm a, harsa vak loin playoff an thleng. Playoff game 4 inkhelah Giannis Antetokounmpo-a'n 20 point, 12 rebound leh 15 assist a nei, playoff chinah triple-double a neih hmasak ber ṭum a tawng.

Heat hi an match hmasa pathumah an chak loh avangin, inhamtang hram rih tur chuan chak ngei ngei an mamawh. Quarter hmasa berah 26-22 in hma an hruai a, chawlhlawk lai pawhin point sarihin hma an hruai.

Mahse, quarter thumna bikah point 13 ngawtin an hnufual a, hun pawimawh laia che fuh zawk Bucks hi hawikir tawh loin an chungnung chhunzawm a, an khingpui Miami Heat beiseina a thamral zui nghal thung.

Greek tlangval, Nets thiampuipa ni bawk Ante­tokounmpo chuan, "Team tana tha ka thawh thei hi ka tan chuan malsawmna a ni. Kan match lehpekah chuan tupawh hmachhawn thei turin kan inpeih a ngai," a ti.

Bucks hian Boston Celtics leh Brooklyn Nets inkhela chak zawk an hmachhawn dawn. Nets hian series-ah 2-1 in hma an hruai mek a, chak tura rinkai zawk an ni. James Harden leh Kevin Durant awmna team hian tukinah Boston Celtics nen game 4 an khel ang.

Inkhel dang
NBA Most Valuable Player nei thei tur zinga ngaih Joel Embiid a che ropui leh a, quarter hnuhnung ber a khel lo chung pawhin point 36 ngawt a nei hman, a team Philadelphia 76ers chu Washington Wizards lakah 132-103 in hnehna a chanpui.

Wizards tan Russell Westbrook chuan 26 point, 12 rebound leh 10 assist nei mah se team chak nan a tawk zo lo, series kal laiah 76ers lamin 3-0 ngawtin hma an hruai tawh a, tlang turin an dinhmun a ṭha tawh hle.

Western Conference lamah Portland Trail Blazers chuan Denver Nuggets 115-95 in an hneh a, team pahnih hi series-ah 2-2 in an inhnehtawk hle. Blazers lamin hnehna an chan theih nan hian Norman Powell chuan point 29 a nei.

Seeded pakhatna Utah Jazz pawhin Memphis Grizzlies 121-111 a hnehin series-ah 2-1 in hma an hruai. Inkhelh hma lawkin Jazz hian an player ropui ni ṭhin Mark Eaton thih thu an hria a, tun ṭuma hnehna an chan hi Eaton tan an hlan.

Kum 64 mi Eaton hian 1982-1992 chhung khan Jazz tan a khel a, club dang a zawm lo. Defensive player of the year atan vawi hnih thlan a ni a, 1995-96 season khan Jazz chuan a jersey hak ṭhin number 53 chu midang tana hak theih tawh loh turin an dah ṭha.