Premier League khel tur Brentford

Brentford-in dai ngai loh ram an dai a, an la khelh ngai loh Premier League an khel dawn - Inrinni zan khan Championship playoff final-ah Swansea City chu 2-0 in an hneh.

Khawvela league ngaihven hlawh ber Premier League khel turin Brentford an inpetkai ve ta a, Ivan Toney (penalty) leh Emiliano Marcondes-ten Brentford tan goal khat ve ve an khung laiin Swansea lamin a chhan letna tur an nei lo.

Brentford boss Thomas Frank chuan, "Lawmnaa khatin ka luangliam a, kei chauh ni lo, ka player leh staff-te thlengin kan hnathawh ropuizia an hria a, an mittui a tla a ni," a ti a, English top flight league an khel tur chu a hlim hle.

Bees (Brentford sawina) hian season hmasa khan Championship playoff final an khel tawh a, Fulham lakah 2-1 in an tlawm - tun season-ah erawh an tlawm nawn tawh lo a, khawvela club ṭha ber berte nena inel turin an inpetkai ve ta.

A thleng ta
1946-47 season hnua a vawi khat nan top flight league khel turin Brentford an inpetkai ve leh ta a, Premier League khel tura an zinkawng ngaihnawm dan hi ziah tham fe a awm.

Brentford hian English Football League (Premier League hnuaia league ho sawina) ah playoff final vawi nga an khel a, playoff round hrim hrim hi vawi 10 an lut bawk - mahse, vawi khatmah playoff patlanga promotion hmuh an nei lo!

May 29 zanah erawh engkim tih danglamin a awm ta - minute 10-na lekah Brentford-in penalty an hlawh chhuak a, Championship-a striker hmuhnawm ber pawl Toney chuan harsatna nei loin goal-ah a chantir.

Kum 25 mi striker hian a career-a season duhawm ber pawl a hmang mek a, season hmasa lawka League One club Peterborough United tana khel striker hian tun season inelna hrang hrangah match 52 khelin goal 33-a khung a, assist vawi 10-a nei bawk.

Swansa vanduaina
Wembley Stadium-ah Swansea an insiamṭha lo - goal an chhuah aṭangin minute 10 a liam a, Bees bawkin goal an khung nawn. Tun ṭuma khungtu erawh Marcondes a ni a, kum 26 mi attacking midfielder-in tun season-a a goal thumna hi a hunah tak a khung.

Swansea-in insiamṭhat tum mah se beisei an phak lo a, Bees tan Toney chuan crossbar hnuai lam a pet per zui - uiawm tak a ni. Swansea hian chance nei lo tawp erawh an ni bik lo.

Mahse, Ghana captain Andre Ayew chuan crossbar a tauh per bakah a chance neih ṭhat dang a hlah a, midfielder Jay Fulton chu Mathias Jensen laka a foul avangin minute 65-naah hnawhchhuah zui a ni.

Player kima an khel chung pawhin Swansea-in si hnih an phur a, player 10-a khelh hnuah an tan 'comeback' ngaihna a awm tawh lo.

Brentford chu
Season hmasa playoff semifinal-ah khan team pahnih hi an lo intawng tawh a, Brentford hian match pahnih belhkhawmah 3-2 a hnehna changin Swansea hi an lo pet chhuak tawh.

Kum 2018-a Premier League aṭanga an tlak hnuin Swansea-in English top flight league an la khel leh lo a, Welsh club tan English football-ah kawl a êng hleithei lo.

Championship playoff final hi infiamna khawvela sum inchuh hnem berna tia sawi a ni ṭhin a, Brentford hi Premier League an khelh dawn avangin season tharah chuan pound maktaduai 170 bawr velin an hausak belh dawn.

Bees coach Frank chuan, "Game 21 tlawm loa kan kal hnuah league hmahruaitu kan ni a, mahse, kan tawlhthlu a, final-ah team ṭha tak kan tum zui - kan zinkawng hi a awihawm lo zawk a ni," a ti a, a hlim hle.