Chelsea leh Tuchel an champion
Inrinni zan Champions League final inkhel hmuhnawmah Chelsea-in champion tura rinkai Manchester City 1-0 in an hneh a, goal awmchhun hi Kai Havertz-a'n a khung. London club hian a vawi hnih nan Champions League nomawi an chawi a, club neitu Roman Abramovich leh manager Thomas Tuchel ten fak an phu hle.
Thomas Tuchel-a'n Premier League champion Man City hi a zawn zatin vawi thum a hneh a, Pep Guardiola-a'n German manager a ngam lo. Spanish manager Pep-a'n kum 2011-a Barcelona a champion pui hnuah tun ṭum hi UCL final a thlen lehna hmasa ber a ni a, a player thlan dan mak sak tak avangin an chak loh chhana mawhphurtu a ni.
Inpuahchahṭha Tuchel
Estadio do Dragao-a inkhel bul ṭan turin German manager Tuchel-a'n a hnampui Kai Havertz leh Timo Werner te a thlang. German player man to pahnih an inlan avang hian Man City nen vawi hnih an inkhelh ṭuma goal khungtu Hakim Ziyech bakah Christian Pulisic te bench-ah an awm a ṭul phah.
Tuchel-a'n thutlukna huaisen a siam chhan hi tum mumal tak a neih vang a ni a, Werner-a tlan chakna leh Havertz-a thiamna te chu Man City nawr nana a hman duh vang a ni. German manager hian mual sir aṭanga nawr turin Reece James leh Ben Chilwell te a thlang a, English wing back pahnih hi an rintlak avangin England manager Gareth Southgate-a tan pawh ngaihtuah tur a tam phah sawt ang.
Goal nawr na Blues
Man City chu team ṭha zawka tura ngaih an ni a, amaherawhchu ṭan phat aṭanga khel ṭha zawk chu Chelsea an ni tlat. Blues player-ten an tihtur an hre chiang a, Timo Werner hriam hret phei se chuan goal an khung hma ang a, goal tam zawk an khung thei bawk ang.
Werner hian six yard box hma chiah aṭangin a pet ṭhelh a, hemi hnu hian chance ṭha dang nei lehin a pet ṭhat tawk loh vangin keeper Ederson-a'n a dang hman. Kum 25 mi Werner-a'n goal net sir a pet per leh a, chance thum a hlah hian minute 15 chiah a la ral.
Man City tlarhma pawhin ṭum dang an pha lo, Raheem Sterling-a'n keeper Ederson-a long ball ṭha zet chu engmah loah a chhuah a. Phil Foden-a goal khung tur chu Antonio Rudiger-a'n a dang hman a, Kyle Walker-a cross chu Riyad Mahrez-a'n a tlawh hman lo. City hian an chance neih pakhat tal chu khung se result a danglam thei ang.
Player man to (£71m) Kai Havertz-a'n a man phu tawkin tun season-ah a la khel lo a, amaherawhchu final-ah goal awmchhun a khung avangin a man a phu ta hle. Havertz hian minute 42-naah Mason Mount-a through ball duhthusam chu um lutin keeper Ederson a paltlang hnuah goal ruakah a khung.
Tlarhnung a phui
Minute 39-naah inhliam vangin Thiago Silva thlak a ngai a, veteran defender aiah Andreas Christensen a rawn lut.
Chelsea-in team angin an tih tur an hre chiang a, Man City thiampuipa Kevin de Bruyne chu minute 60-na lekah inhliam vanga lakchhuah a ngaih bawk avangin Blues tlarhnung an su tlang thei lo.
Man City-in chance mumal an insiam thei lo a, Sergio Aguero leh Gabriel Jesus te pawhin danglamna an thlen thei lo. Tuchel leh a hote final atan an inpuahchahna a ṭha a, tlarhnunga awmze neia an inrem khah ṭhap avangin Edouard Mendy pawhin hna a nei meuh lo a, chak phu zawk Chelsea 1-0 in an chak.
Mi bik N'Golo Kante
Champions League final hmuhnawm taka player khel ṭha ber chu 5ft 6in leka sang N'Golo Kante a ni a, French midfielder hian Chelsea a champion pui. Kum 30 mi Kante hi Estadio do Dragao khelmual 115 x 68 m-a zauah kil tinah hmuh tur a awm a, Chelsea midfielder hi a taima ringawt lo a, a thiam tel.
Kante hian Chelsea tlarhnung leh tlarhma chu ṭha takin a thlun zawm a, goal khungna chance thlenga neiin first half-ah pawh a tauh goal teuh hle. Leicester City aṭanga Chelsea zawmtu Kante hi midfield-ah Jorginho nen an inkawp rem em em a, Man City goal nawr tur vawi tam a chhu chat a, a ṭul hunah a khalh chhuak thei bawk. Kante-a'n Kevin de Bruyne ball khalh lai 'foul' loin tackle chungin a chhuhsak a, midfielder ṭha bik a nihzia a pholang.
Blues-in semifinal-a Real Madrid an hneh ṭumin first leg leh second leg-ah man of the match lawmman a dawng a, final-ah pawh a phu ang ngeiin a dawng leh bawk. Kante hi kum 2013-ah kha chuan Ligue 2 club Caen tan a la khel a, Ligue 1 a kaipui. Leicester City-in pound maktaduai 5.6 in kum 2015 khan an lei a, khawvelin tu nge Kante hi an hi an la hre lo. Amaherawhchu, Foxes-in Premier League an champion chiah kha chuan Kante chanchin an inhriatsiak tawh. Tunah chuan Kante hian Premier League nomawi pahnih a chawi tawh a; FA Cup, Europa League leh Champions League te bakah FIFA World Cup thlengin a champion tawh a ni.
Chelsea midfielder hlui Joe Cole chuan, "Chelsea tan hian N'Golo Kante aia pawimawh an awmin ka hre lo, team chakna thahrui a ni. Claude Makelele ka khelhpui tawh a, ani kha defensive midfielder ṭha berah ka ngai ṭhin a, tunah chuan Kante ka hmu ta. Ani hi chu Makelele leh tlem a ni," tiin Kante a fak hle. Final zan hian Joe Cole hi BT Sport tan a ṭhu a, Kai Havertz-a'n goal a khung chiah khan nasa takin a zuang a, a club hlui Chelsea a la hmangaihzia a pholang.
Havertz a to thlawn lo
Nipui bazarah Chelsea-in pound maktaduai 71-in Bayer Leverkusen aṭangin Kai Havertz an lalut a, Stamford Bridge a zawm hian German midfielder hian Champions League-ah goal a la khung lo. Kum 21 mi Havertz hian final hma hian Blues tan Europe-ah match 11 zet a khel chungin goal a la khung chuang lo - mah se Thomas Tuchel-a'n bul a ṭantir.
Havertz hian final-ah UCL-a a goal hmasa ber a khung a, goal awmchhun a ni bawk. Inkhelh banah Havertz chuan, "Tlang taka sawi chuan tun dinhmunah hi chuan ka man chungchang an sawi hi eng atan mah ka ngai lo, Champions League-ah kan champion," tiin a sawi a, tun ang hun thleng tur hian kum 15 chhung rim taka a thawh tawh thu a sawi tel bawk. Blues captain Cesar Azpilicueta chuan, "Havertz-a rilru put hmnag hi a dik a, superstar a la ni ang. A thawkrim em em a, final-a goal khung pawh hi a phu a ni," tiin chakna goal khungtu a fak.
Abrahmovich-a huaisen rah sengtu Chelsea
Chelsea neitu Roman Abramovich-a'n huaisen takin kumin January 25 khan club legend Frank Lampard chu manager aṭagnin a ban a, London club hian Frankie an ban tukah Thomas Tuchel an lakluh thu an puang nghal.
Mi tam tak chuan Russian billionaire hian dawhtheihna a tlachhamah an ngai a, season tawpah erawh Champions League nomawi an chawi theih phah. Kum 54 mi Abramovich hian kum 2003 khan Chelsea a lei a, Blues hi Premier League nomawi panga bakah Champions League nomawi pahnih a chawipui tawh.
Abramovich hian kum 18 chhungin hlawhtlinna duh vangin manager 15 a hrawn tawh a, Chelsea neitu chuan, "Frank Lampard ban kha club tan chuan thutlukna ṭha tak a ni a, ani nen khan inkungkaihna kan nei ṭha hle. Amah kha kan ngaina a, a thawhrim bakah tum mumal tak a nei bawk. Amaherawhchu, kan team dinhmun thlir khan manager thlak kha a ṭulah kan ngai a, a hun takah thutlukna dik kan siam a ni," tiin a sawi.
Chelsea hian March 4, 2012 khan manager André Villas-Boas an ban a, manager lailawk Roberto Di Matteo hoin a vawi khat nan Champions League-ah an champion. Kum 2008 pawh khan September 20, 2007-ah Jose Mourinho a chhuak a, manager lailawk Avram Grant kaihhruainaah a vawi khat nan final an lut a, Manchester United lakah an vanduai. London club-in kum 2013-a Europa League an champion pawh khan November 2012-ah Roberto Di Matteo an ban a, manager lailawk Rafael Benítez hoin nomawi an chawi. Abramovich-a'n manager a thlak apiangin rah ṭha a hmu ṭhin a, Thomas Tuchel pawh a chesual a nih chuan a ban hreh hauh lo ang.
Chelsea thluak bur Tuchel
Thomas Tuchel-a kaihhruaina hnuaiah Chelsea an champion a, German manager 'game plan' a fuh takzet. Goalkeeper Edouard Mendy-a'n kumin inelnaah a vawi kua nan clean sheet a nei a, tlarhnungah Antonio Rudiger leh Thiago Silva aiawha rawn lut Andreas Christensen te an khel ṭha em em bawk.
Tuchel-a hian a khelh dan ṭhin a ringtawk a, a tifuh. Guardiola erawhin tun season-a hlawhtling taka a naute a khelhtir dan angin final-ah a khelhtir ngam lo thung. Chelsea manager Thomas Tuchel chuan, "Man City hi team ṭha tak an nih avangin hneh tur chuan ṭha chungchuanga khelh a ṭul a, kan khel ṭha takzet. Tawnhriat ṭha tak a ni a, hlawhtlinna ropui a ni. Tunah chuan champion kan lawm phawt ang a, champion hi kan châk reng a ṭul a ni," tiin a sawi.
Champions League hnuhnung pathumah German manager pathum Jurgen Klopp (Liverpool, 2019), Hansi Flick (Bayern Munich, 2020) leh Tuchel (Chelsea, 2021) ten an team enkawl an champion pui a, 'German Hattrick' tih hming an pe.