Pep-a'n duh a thlang sual - a man chu tam tak!
Inrinni zan khan Manchester City-in an club chanchina match pawimawh ber tih hial ngam an khel a, Pep Guardiola thutlukna avangin kut ruakin an haw.
May 23 zanah Manchester City leh Chelsea-ten Champions League final an khel a, khawvelin chak tura a rin zawk chu Premier League champion City an ni.
Mahse, Estádio do Dragão-ah minute 90-a ral meuh chuan Chelsea zawkin European champion nomawi an chawi a, Pep leh a nauten mittui nen an khingpui champion lai an thlir.
Chelsea hi team ṭha tak an ni - mahse, season laihawla coach thlak an ni a, season nga zet Pep-a hnuaia intuai hnum tawh City nen khaikhin chi an ni lo a, khawvelin City a ring zawk hi thil mak a ni lo.
Thil mak - I
Porto khawpuia team pahnih inkhelh hmain inkhel bul ṭan tur hming a rawn lang a, thil mak pakhatna a thleng nghal - Pep-a'n starting XI-ah holding midfielder-a dah lo a, Rodri leh Fernandinho chu bench-ah an awm!
Pep-a'n 4-3-3 formation-ah tlarhnung a rem dan sawisel tur a awm lo. Mahse, midfield-ah Bernardo Silva, Ilkay Gundogan leh Phil Foden-a rawn rem a, player pathum hi goal nawr nuam ti ṭhah an ni.
Tlarhmaah Kevin De Bruyne chu 'false 9' angin a awm a, a sir aṭanga goal nawr pui turin Raheem Sterling leh Riyad Mahrez an awm bawk - tun hnaia khel ṭha lo tak Sterling-a'n Champions League final meuha bul a ṭan hi a mak tih bak sawifiahna a vang hle.
Pep-a'n attacking game a ngaina tih chu thil chiangsa a ni a, a player rem danah nawr nat a tum tih pawh a lang - a pawi ber erawh Spanish coach-in 'venghimtu' a ngaihtuah tel lo hi a ni a, chem tat hriam viaua a inngaih laiin indanna tur 'phaw' a ngaihtuah tel lo.
Pep-a ngaihtuahna
Spanish coach-in UCL final-a player a rem dan ang hian tun season-ah an la khel miah lo a, mahse, final game pawimawh lutuk kha Pep hian a ruahmanna tih danglam nan a duh tlat!
Thomas Tuchel-a'n Chelsea a enkawl hnuah UCL final hmain City hi vawi hnih a tawng a, a hneh ve ve - FA Cup semifinal-ah an intawng phawt a, 1-0 in Chelsea an chak.
He inkhelah hian Pep-a'n 4-2-3-1 formation a hmang a, Rodri leh Fernandinho-ten bul an ṭan ve ve.
Premier League-ah an intawng leh a, 2-1 in Chelsea an chak nawn - Pep-a'n hemi ṭum hian 3-1-4-2 formation a hmang a, Rodri chuan bul ṭanin tlarhnung venpui hna a thawk.
Pep-a'n English football-a Tuchel-a Chelsea a hmachhawn hmasak pahnihah holding midfielder a hmang ve ve a, a chak zo lo ve ve - hei vang hian khelh dan phung thlak a, Blues rin loh dana khelh a tum niin a lang. Chelsea leh khawvel rin loh danin City an khel ngei a, mahse, a ṭha lo zawngin a ni ta thung!
Thil mak - II
Pep-a'n huaisen takin thutlukna a siam a, a huaisen rah a seng dan erawh a duhawm lo hle - Gundogan leh Silva-ten an tih tur an hre chiang lo a, season hmang ṭha tak Mahrez a zakzum thar a, Sterling-a'n bul ṭan a phu lohzia bak a tilang lo.
Chelsea-in minute 39-na lekah defender ṭha bik leh hruaitu ṭha Thiago Silva chu hliam vangin an chan a, talbuai pawh ni se an thiamawm viau laiin a talbuai zawk erawh City an ni tlat.
Tuchel-a'n risk lak a duh ve lo a, a formation thiam sa 3-4-2-1 hmangin Blues a rem a, a innghahna fullback Reece James leh Ben Chilwell-ten an tih tur an ti a, mual vei lam aṭanga Chilwell leh Mount-ten an nawr ṭhin dan phei chu hmuhnawm a tling.
Blues tana Kai Havertz khelh dan hmuh hmaih theih a ni lo a, inkhela goal awmchhun luh nana a chi ai lohna leh skills khan Blues-in pound maktaduai 71-a an lei ngam chhan a pholang.
Pep a mangang
City-in duh aia rei goal an phur a, Pep a mangang leh si - minute 60-naa KDB 'meuh' thlak tura a luhtir Gabriel Jesus tan danglamna thlen hun hman a awm lo a, Pep a za tlat.
Minute li hnuah substitution a siam lehnghal a, defensive midfielder bul ṭan hunah attacker a luhtir avangin goal khung tura forward luhtir hunah Fernandinho luhtir a ngai a, Brazilian midfielder hian minute 64-naah ṭangkai lo Silva-a thlak.
Fernandinho luh erawh a tlai tawh - Chelsea midfielder ṭha mi N'Golo Kante-a'n midfield mai ni lo, khelmual pumah a duhthalin ro a lo rel tawh a, French midfielder hian a thawhrimna leh thiamna hmangin Champions League final chu kawngpui dunga duhthala inkhelhna ang maiin a hmang.
Hetihlai hian Tuchel erawh a substitution siam dan turah a chiang - minute 66-naah Timo Werner a la chhuak a, Christian Pulisic-a dah lut chat. Minute 80-naah inven a ngai tih a hria a, Mount la chhuakin Mateo Kovacic-a luhtir zui.
A tawpah Aguero
Pep-a'n a tirah thutlukna a siamsual avangin chi ai takin substitution a siam a, Tuchel-a'n ruahmanna fel tak nei sain engkim a buaipui thung - Inrinni zan bikah chuan Spanish coach thluak hian German pachal ngaihtuahna a phak lo.
Minute 77-naah Pep-a'n khel ṭha lo Sterling a la chhuak ta nge nge a, City tana a match hnuhnung ber khel turin Sergio Aguero a luhtir a, Argentine striker hian a duh danin City tana a match hnuhnung ber erawh a khar thei bik lo.
Aguero hian, "Champions League nomawi ka chawi hma chu City ka chhuahsan lo ang," tiin a lo sawi tawh a, season tawp ruala a chhuah dawn avangin a thusawi dikna hi thleng ngei turin fans tam takin an duh.
Mahse, a chet sual ṭhinna, 'ngaihtuahna sen nasat luat' naah bawk Pep-a chesual a, Aguero-a'n a duh angin City a mangṭha thei lo. Argentine striker hian City-ah kum 10 hun a hman chhungin match 390 khelin goal 260-a khung a, assist 73 a nei. Nomawi tam tak a chawi a, a duh ber Champions League erawh a chawi ta lo. Pep - nang vang a lo ni!