Angelique Kerber a tla nghal

Nimin tlai khan French Open 2021 khelh ṭan a ni a, hmeichhe singles huangah Grand Slam vawi thum champion tawh Angelique Kerber chu player langsar tla hmasa ber a ni.

First round-ah Kerber hi world number 139 Anhelina Kalinina nen intawngin, darkar khat leh minute 26 an khelh hnuah 6-2, 6-4 in a chak lo. World number 1 hlui hian match point hmasa inchhanhim theih mah se a hnuhnung zawk a dang zo lo.

French Open khelh hmain Kalinina hi mi hriat hlawh a ni ngai lo. Australian Open kha main draw a khel pha lo. Roland Garros pawh hi qualifiying aṭangin a khel ṭan, qualifier match thum a khelh chinah erawh set a hloh miah lo a ni.

Inelna tak a khel zui a, amah aia tawnhriat nei ṭha zawk Kerber lakah chak lo tura rin zawk ni mah se a zam duh bik chuang lo. German nula leh seeded 26-na ni bawk lakah hian set hloh loin hnehna a chang.

Kum 33 mi Kerber hian tun hma lamin Paris khawpuiah hian quarterfinal vawi hnih a thleng tawh. Mahse, tun hnaiah erawh result ṭha a nei hleithei lo, a zawnin season thum chu a match hmasa berah a tlawm ta.

Nimin inkhel dangah Naomi Osaka chuan Patricia Tig chu darkar khat leh minute 47 chhungin 6-4, 7-6 in a hneh. Japanese nula hian tun hmain clay court-ah beisei a phak lo ṭhin, kuminah hlawhtlin ngei tumin thapui a thawh.

Osaka hi tun ṭumah hian seeded pahnihna pek a ni a, a match hmasa berah hian harsatna lian tham a tawk lo. Set hnuhnung zawkah tie break khelh ngai mah se a chesual lo, tun hma lama a hlawhtlin theih ngai lohna hmunah thlen san a tum ang.

Vawiin hian inelna neih chhunzawm nghal a ni dawn, mipa singles lamah player ṭha Rafael Nadal, Roger Federer leh Novak Djokovic te an inlan dawn. Kumin French Open hi a hmunah entu an awm thei a ni.

Grand Slam vawi 20 champion tawh pahnih Nadal leh Federer inlan tur hian ngaihven a hlawh dawn, major title lak hnem lama inel mek an ni a, tun ṭumah chuan Nadal hi rinkai zawk a ni.

July thlaah Wimbledon an khel zui dawn, grass court lama hlawhtlin tum Federer tan tun ṭum hi inbuatsaihna a ni nghal a, season dang aia thlen san ngei a tum ang.