UAE-ah IPL an khelh chhunzawm dawn
Indian Premier League (IPL) season kal lai chu India rama khelh chhunzawm a ni tawh dawn lo. September leh October thla chhung hian United Arab Emirates-ah khelh tura ruahman a ni.
Twenty20 tournament hi India ramah khelh a ni a, mahse May 4 aṭang khan hripui leng vangin chawlh lailawk a ni. Board of Control for Cricket in India (BCCI) chuan Inrinni khan an kalphung thar tur hi an tichiang.
Ruahman dan ang pangngai chuan kal se la chuan - Chennai, Bengaluru, Mumbai, Delhi leh Ahmedabad te inelna hi an in thlen chhawk tur a ni. Mahse, hri lengin a tibuai a, inelna an neih chhunzawm theih leh hun tura ngaih hi India ramah chuan ruah sur hun a lo ni leh tawh dawn.
BCCI honorary secretary Jay Shah chuan, "Inrinni khan Board of Control for Cricket in India (BCCI) chuan VIVO Indian Premier League 2021 season kal zel dan tur a ngaihtuah a, India rama ruahtui tlak a hun tawh avangin United Arab Emirates (UAE)-ah kan khel tawh ang.
"Thutlukna hi Special General Meeting (SGM) hmanga siam niin, ICC T20 World Cup 2021 pawh kan thlen theih ngei a rinawm. Hemi tur hian ICC hnenah hun min pawhseisak tura ngen a ni," tiin a sawi.
IPL hi match 60 khelh tura tih a ni a, tunah hian 29 khel tawhin khelh hmabak match 31 an la nei.
