Czech Republic-in Scotland-a inkulh an tum lo
Euro 2020 khel tur Czech Republic chuan an squad awmna turin Scotland national training centre 'Oriam' chu hauh lawk mah se Scotland-in Covid-19 dan khirh tak an kalpui avangin Oriam-ah hian in kulh an tum leh lo!
Euro 2020 hi ṭum dang ang lo takin ram 11-in an inthlen ṭawm dawn a, a thleng tur zingah Scotland pawh an tel - group stage match ṭhenkhat leh round of 16 match khat an thleng dawn.
Scotland hi group D-ah England, Croatia leh Czech-te nen hian an awm ho a, group D match-te hi England leh Scotland-te inthlen ṭawm tur a ni.
Hetiang a nih avang hian Czech lam chuan awlsam taka an inkhelh mai theihna turin Scotland-a inkulh tumin Oriam hi an hauh lawk a, mahse, Covid-19 avangin an ram khawpui Prague-ah an inkulh leh ta zawk dawn.
Czech Republic chuan thuchhuah siamin, "Czech national team chuan UEFA Euro 2020 tournament khelh chhung zawng Edinburgh-a inkulh turin ruahmanna lo siam tawh mah ila, ruahmanna hmasa hi thlak a ni a, Prague aṭangin inelna hi kan hmachhawn zawk leh si dawn a ni.
"He thutlukna kan siam chhan hi Scotland-in Covid-19 dan khauh tak an kalpui vang a ni a, tuna an dan ang chuan kan player pakhat lek pawh positive se, team pumpui inkhunghran zel a ngai dawn a ni," an ti.
Czech chuan Scotland inkhuahkhirhna dan chu UEFA ruahmanna nen a inmil loh thu an sawi bawk a, hetihrual hian an rama training tur pawh hian tihfel tur tam tak an la neih thu an sawi.
Scotland hi England lama Middlesbrough khawpuiah an inkulh mek thung a, hun a tlem tawh avangin Czech lam inhnukdawk mah se Oriam-ah hian an insawn a rinawm chiah lo.
Steve Clarke enkawlna hnuaia khel Scotland hian November khan playoff hmangin Euro khel turin an dinhmun an tichiang ve chiah a, Euro an khel dawn tih an hriat hma hian Czech lam hi an national team training centre-a inkulh hi an lo phalsak tawh a ni.