England-in Euro inbuatsaihna an ṭan
Euro 2020 khel tur England squad chu Inrinni khan an inhmukhawm ṭan a, Europa League final khel Manchester United leh Champions League final khel Chelsea leh Manchester City player-te erawh an la tel ve rih lo.
England coach Gareth Southgate-a'n Euro khel tur atan player 33 hming a puang tawh a, mahse, final squad hi player 26 tur a nih avangin player pasarih chu an la chhawk leh dawn a ni.
Southgate-a squad-ah hian Europa League final khel, Manchester United player panga, Chelsea player pathum leh City player pali an tel.
England captain Harry Kane chu player thleng hmasa zingah a tel a, West Ham-a harhtharna chang Jesse Lingard, Everton forward Dominic Calvert-Lewin leh La Liga-a Atletico Madrid champion puitu Kieran Trippier-te pawh a thleng hmasa zingah an tel.
Liverpool captain Jordan Henderson chuan squad-a zawm ve bawk a, English midfielder hi February khan a ṭhal hliam vangin zai a ni a, Three Lions tana inkhel turin tunah chuan a inpeih leh tawh.
England hian June 1-ah an final squad an puang ang a, June 2 zanah Austria nen friendly match an khel ang a, June 6 zanah Romania nen vek friendly match an khel leh bawk ang.
Euro 2020-ah Three Lions hi group D-ah Croatia, Czech Republic leh Scotland nen an awm ho a, an match hmasa ber hi June 13 zanah Croatia nen Wembley Stadium-ah an khel dawn.