Napoli coach thar Spalletti
Serie A club Napoli chuan Gennaro Gattuso hmun ruak luah turin Luciano Spalletti an lalut, a hna thar hi July thla aṭangin a thawk ṭan dawn a, a contract rei zawng leh a hlawh zat tur erawh tarlan a ni lo.
Italian manager Spalletti hian tun hmain club hrang hrang a lo enkawl tawh, 2019 khan Inter Milan nen an inṭhen a, San Siro a chhuahsan hnuah tun ṭum hi team a enkawl lehna hmasa ber tur a ni ang.
Napoli president Aurelio de Laurentiis chuan, "Luciano kan lo lawm a che, ropui takin hna kan thawk dun ang," tiin an manager thar chungah beisei an neih san thu a sawi a, European football inelna sang khelh an beisei dawn.
Season hmasa khan Gattuso kaihhruaina hnuaiah Napoli hi Serie A-ah pangana an ni, match hnuhnung bera an chak loh avangin UCL an khel phak dawn lo. Manager Gattuso a chhuak zui a, tunah chuan Fiorentina a enkawl dawn tih a chiang tawh.
Gattuso thlaktu Spalletti hian Italian football-ah tawnhriat a nei ṭha tawh, Serie A match 482-ah team kaihruai tawhin, Roma a enkawl laiin Italian Cup leh Super Cup a lo chawi tawh.
Serie A club lian ten an manager an siksawi nasa hle. Juventus chuan Andrea Pirlo banin tun hma lama an team enkawl tawhtu Massimiliano Allegri an lalut a, champion Inter Milan manager Antonio Conte a chhuah hnuah Simone Inzaghi a lut ve leh thung tawh bawk.