Alaba-a'n Real Madrid a zawm

Austria defender David Alaba chuan Bayern Munich a chhuahsan hnuah free transfer-in Real Madrid a zawm a, kum nga chhung khel turin contract-a ziak.

Kum 28 mi Alaba hian kum 2008 khan Bayern Munich youth team a zawm a, German champion tan inelna hrang hrangah match 431 khelin goal 33-a khung a, nomawi chawi theih ang chu a chawi kim.

Alaba hian Bayern-ah season 12 hun a hman chhungin Bundesliga nomawi vawi 10-a chawi a, German Cup (6), German Super Cup (6), Champions League (2), FIFA Club World Cup (2) leh UEFA Super Cup (2) ah te a champion bawk.

Austria player of the year atana vawi sarih thlan tawh Alaba hi Euro-a ram tana inlan turin a inbuatsaih mek a, Austria hi group C-ah Netherlands, North Macedonia leh Ukraine-te nen awm hoin last 16 luh a awlsam lo ang.