Etihad Stadium-ah Arteta a kir dawn

Arsenal manager Mikel Arteta chuan zanin dar 1:00 hian coach a nih theih nana amah siam liantu Pep Guardiola enkawl Manchester City a hmachhawn dawn, hnehna chan ngei tumin City khelmual Etihad Stadium an pan tur thu a sawi.

Gunners hi kum 2020 bika Premier League match-a chak loh la nei lo an ni, an kaltluang viau. Man City hi an hmelma Manchester United laka tlawm hlim an ni thung a, match zawna chak loh chu an tum lo ang.

Pep Guardiola-a'n Manchester City a enkawl dawn khan thachhangdawltu amahmawh tih a inhria a, chumi atan chuan Arteta hi thawhpuiah a sawm - an thawhdunna ṭhat zia chu inhrilh nawn a ngai lo.

Arteta hian player a nih laiin English football a hrechiang, inkhelh a chawlhsan hnu khan coaching luhchilh a tum avangin Pep nena hna thawhdun kha atan thil ṭha tak a ni. Guardiola tan pawh Arteta thawhpui kha thutlukna finthlak tak a ni bawk.

Spanish manager pahnih hi tunah chuan team hranah an awm tawh, tawnhriat nei ṭha Pep-a'n squad a neih chhah bakah anmahni muala khel tur an nih avangin chak tura rinkai zawk a ni a, chutih rualin Arteta tan hnehna chan theih chu thil châkawm tak a ni ngei ang.

Etihad Stadium an tlawh tur chungchang sawiin Arteta chuan, "A nuam dawn, ka phur tawh takzet. An thil tum ka hria, chu chu hnehna chan a ni. Man City chuan an khingpui apiang hneh an tum ṭhin, chumi do let tur chuan keini lam pawh kan inbuatsaih.

"Keini chuan point thum hmuh ngei tumin kan bei dawn, hnehna kan chan theihna tur a nih chuan khelmual chhungah kan tih theih zawng zawng kan ti ang, hnehna chang tur erawh chuan kan ṭhat dan bera kan khelh chhuah a ngai dawn a ni," a ti.

Spanish manager Arteta hian tun ṭum an inkhelh tur bik atan Pep Guardiola nen an inbiak loh thu a sawi. Arteta chuan, "Kan hna atan rilru kan pe ve ve a, chumi chu a tawk mai," tiin a sawi. Man City fans lamin ṭha taka an lo dawnsawn a beisei thu a sawi bawk.

Pep Guardiola-a'n a defender rinrawl Aymeric Laporte a chhawr mumal theih loh avangin kuminah an tlarhnung a nghet tawk lo, league match 28 khelh tawhah goal 31 an chhuah - an hnuaia awm Leicester City aiin goal sarihin an chhuah tam, Foxes hian match khatin an khel tam zawk.

Manchester derby-ah City an chak lo a, Man United an hneh loh ṭuma an goal chhuah pahnihah keeper Ederson a chesual. Pep chuan, "Man United lakah khan kan khel ṭhain ka lung pawh a awi, tihsual hi chu inkhelin a ken tel ve pakhat a ni," a ti. Spanish manager hian a keeper Ederson chu player ṭha bik a nih thu a sawi tel, Arsenal lakah pawh Brazilian keeper hi a inlan ngei a rinawm.

Spanish manager Pep Guardiola-a'n inkhelh banah a naute an khelh ṭhat thu sawi mah se tun season-ah vawi sarih tehmeuh an chak loh tawh avangin season hmasa an phak lo a. Eithad Stadium-a inkhel tur an ni nachungin Arsenal tan beisei tur a awm.