Barcelona tan rawlthar duhawm Fati

Lionel Messi thlaktu tur mamawhtu Barcelona-in an duh chhanna an hmu a, rawlthar duhawm Ansu Fati chuan Pathianni zana La Liga match-ah goal hnih a khung.

Barca hian an mikhual Levante chu 2-1 in an hneh a, Catalan club ṭantuten kum 17 mi Fati chetziaah an thiampuipa Lionel Messi hlimthla hmu-ah an inngai ang.

November-a 3-1 a Barcelona lo ngam tawhtu Levante-in Nou Camp-ah pawh chak theih an inbeisei a, mahse hun pek belha Ruben Rochina goal khungin a chhan chhuak hman ta lo. 

Inrinni zanah Real Madrid-in hnehna an chan avangin table chung berah an la awm chhunzawm a, Barca hian hmahruaitu Madrid khaw club hi point thumin an thlau mek. 

Inkhel ṭan aṭanga minute 30-na lekah Barca-in goal an khung nghal a, Fati khung a ni. Spanish rawlthar duhawm hian a goal hnihna khung turin minute khat dang bak a mamawh lo a, minute 31-naah an goal hnihna a khung zui. 

Sevilla youth team tan pawha lo khel tawh winger hian kum 2012 khan kum 10 mi lek niin Barcelona hi a zawm a, player thiam bik a nih avangin July 2019 khan a professional contract hmasa ber ziahpui a ni. 

Kum 2022 thleng atan contract hi a ziak a, August khan reserve team tan pawha la inlan lo nichungin senior team tana a match hmasa ber a khel nghal.

Fati hian kum 1941 a Vicenc Martinez chiah phak loin Barca tana inlan thei naupang a ni a, Martinez aia ni 18 leka upa niin kum 16 leh ni 298 mi a ni. 

Fati hian Barcelona jersey haa senior team tana a khelh hnuah record a siam chho zel a ni ber. September 2019 khan Catalan club tan a vawi khat nan inkhel bul a ṭan a, 5-2 a Valencia an hnehna inkhelah hian goal leh assist a nei. 

Valencia an hmachhawnna inkhelah hian Fati hi kum 16 leh ni 318 mi a ni a, La Liga match-a goal leh assist nei kawp thei hmasa ber record a siam. 

September 17 khan Barcelona tan Champions League-ah Borussia Dortmund a hmachhawn a, kum 16 leh ni 321 mi niin Barcelona tana European top flight club inelna sang bera inlan thei naupang ber a ni. 

December 10 khan Fati hian record a siam leh a, San Siro stadium ropuiah Inter Milan hmachhawnin goal a khung. Kum 17 leh ni 40 mi niin Champions League-a goal khung thei naupang ber record a siam. 

Levante laka 2-1 a an chakna inkhelah Fati hian record a siam leh ta a, La Liga match khata goal hnih khung thei naupang ber a ni.

Fati hi kum 17 leh ni 94 mi a ni a, Malaga striker Juan Miguel Jimenez-a'n kum 2010-a kum 17 leh ni 115 nichunga record a lo siam tawh chu a khum.

Pathianni zana Fati record siam zanah Levante goalkeeper Aitor Fernandez chu dem theih a nihna chen a awm a, Barca goal chhuah danah Marc-Andre ter Stegen dem loh theih a ni bik lo. 

Hetihlai hian Barca tan Antoine Griezmann leh Nelson Semedo te chuan chance ṭha lutuk an khawhral bawk a, point thum an hlawhchhuah tho avangin an vannei. 

Lionel Messi-a'n, "Ka player duhzawng tak a ni a,  theihtawpin puih ka tum ang," tiin Fati chungchang a lo sawi tawh a, Ronaldinho leh Frank Rijkaard ten an puih anga puih a tum.

Fati-a vannei takzet - khawvela footballer tu pawhin Messi bulah khelh an châk ang tih a chiang a, Argentine forward hnuaia inzir phei chu an chak lehzual ang. 

Messi-a'n a tiam ang ngeiin Fati a pui a, Levante laka Spanish rawlthar goal khung pahnih pawh hi Lionel Messi ke aṭanga chhuak a ni. 

Barcelona tana match 711-a goal 622 khung tawh Messi hi kum 32 mi a ni tawh a, Barca fan-ten Fati hmelah Messi hlimthla an hmu a nih pawhin an demawm loh ang.