Jerry-a'n Chennaiyin a chhuahsan dawn

Chennaiyin defender Jerry Lalrinzuala chuan season tharah chona thar hmachhawn tura club dang a zawm tur thu Vanglaini a hrilh a, Bethlehem Veng tlangval hian tun season-ah a contract neihlai a hmang zo tawh dawn. 

Jerry hi Chennaiyin-in tun season Indian Super League-a final an luh nan player pawimawh a ni a, semifinal match hnihah Emerging Player of the Match chawimawina a dawng ve ve. 

Indian defender ṭhang duang ber pawl Jerry chuan, "Chona thar hmachhawn ka duh ve tawh a, hmun danga thil thar tawnte pawh a châkawm ve tawh a ni," tiin Vanglaini a hrilh. Jerry hian 2016 aṭang khan Chennaiyin-ah hian a khel tawh a, 2017-18 season khan Indian Super League nomawi a lo chawi tawh. 

India tana vawi ruk inlan tawh Jerry hi FC Goa, Hyderabad FC, Odisha FC, Bengaluru FC leh Mumbai City-te chuan lakluh tumin an dawr vek tawh a, ISL final khelh zawhah thutlukna a siam ang. ISL final hi Inrinni zan dar 7:30-ah khelh a ni dawn a, ATK chuan Jerry, Lallianzuala Chhangte leh Laldinliana Renthlei-te khelhna Chennaiyin chu Goa-ah an hmachhawn dawn a ni.