BS-i a vanduai, Silver medal a dawng

Asian Boxing Confederation hnuaia inelna ASBC Asian Elite Boxing Championship-ah Lalbuatsaihi chuan final-ah Milan Safronova chu split decision 3-2 (27-30, 29-28, 27-30, 29-28, 27-30) in an hneh lo. Inelna hi Dubai, UAE-ah neih a ni a, Mizo nula a vanduai hle.

Beisei nei BS-i
Tuithiang nula BS-i hian semifinal-ah Kuwait nula Noura Almutairi chu round hnihna lekah technical knockout hmangin a hneh a, final-ah pawh chak turin beiseina a nei sang hle.

BS-i hi Sashastra Seema Bal (SSB)-ah boxing thiam vangin hna a hmu a, tun ṭumaah hian light welterweight (64kg) category-ah a inlan. National team-ah BS-i a tirah a tel lo a, Pwilao Basumatary a inlan theih loh avanga koh leh hnuhnawh a ni.

Covid-19 vangin BS-i hian inpuahchahna ṭha a nei thei lo a, amaherawhchu mahni invawng tak a nih avangin in lamah pawh a workout mai ṭhin. Dubai a pan hma hian quarantine a ni a, BS-i hian duhthusamin inpuahchahna ṭha nei lo.

Final chu
BS-i khingpui hi AIBA Women’s World Boxing Championships bronze medalist Milana Safronova a ni. Kum 30 mi Kazakhstan boxer Safronova hian ṭan phatah a rawn nawr nghal a, a rawn attack nghal. Amaherawhchu BS-i a insiamrem nghal a, Mizo nula hian a glove hmanga a in block ṭhat bakah chiang takin Safronova hi a hnek fuh a, an intluk tawk hle.

Round 2-ah BS-i nasa takin a insiamṭha a, a kut dinglam hmangin a khingpui Safronova a hnek fuh hnem zawk niin a lang. Round hnihnaah hian Mizo nula a che ṭha zawkah a ngaih theih. Round tawp berah Safronova-a'n a tawnhriat a hmang ṭangkai a, Kazakh boxer hian fing takin BS-i rawn 'attack' tur chu a kuah bet a, Mizo nulain a duh angin a nawr thei ta lo. Inhnek mumal loin round 3 a tawp. Hriat tel tur erawh Kazakh boxer Safronova hi a sang zawk a, a zuan a zâng zawk bawk

BS-i a vanduai
Result an puang a, split decision-in Milana Safronova a chak. Judge pathum UAE, Croatia leh Hungary lam mi chuan round tinah Kazakh boxer hi an chaktir vek a, 30-27 vek an pe. Judge dang pahnih Singapore leh Eygpt lam mi te chuan Mizo nula hi 29-29 in an chak tir ve thung. BS-i chet ṭhatna round hnihnaah hian Egyptian judge chauhin Mizo hi a chaktir.

Mizo mipui nawlpui chuan judge thutlukna pawm harsa an ti a, Mizo boxing coach te pawhin judge thutlukna an pawm lo. BS-i training neihpuitu boxing coach Sete-a chuan, "BS-i chak turah ka ngai. Round 1-ah khan BS-i'n clear punch a ngah zawk. Round 2-ah pawh khan a hnek fuh chiang thei hle. Round tawp berah erawh in kuah bet a tam lutuk a, referee khan warning a pe turah a ngai," tiin Vanglaini a hrilh.

SYS-a boxing coach R. Lalbiaksangi chuan, "Round hmasa pahnih kha chu BS-i khan a la, round tawp ber kha chu an inkuah reng a, draw ang vel a ni. Ka mitah chuan Mizo nula a chak," tiin Vanglaini a hrilh ve bawk.

Gold pakhat
Asian Elite Boxing Championship-ah hian Indian hmeichhe zingah Pooja Rani chiahin gold medal a la a, Haryana boxer hian middle weight final (75 kg)-ah Uzbekistan boxer Mavluda Movlonova chu hneh a hneh.

India chhuanvawr Mary Kom chu Kazakhstan boxer Nazym Kyzaibay lakah a vanduai a, flyweight (51 kg) inelnaah silver medal a la. Heavy weight (+81 kg) category-ah Anupama Kundu-i'n final-ah Kazakhstan boxer Lazzat Kungeibayeva a hneh lo.

Kazakhstan che ṭha berin gold pariat, silver pakhat leh bronze pahnih an la a, Uzbekistan (G-1, S-5, B-5) in an dawt. India pathumnaah an awm a, gold pakhat bakah silver pathum leh bronze pariat an la a ni.

A hmasa berah chuan Pathian hnenah lawmthu ka sawi. Ka chhungte min thlawp ṭha a, bang loin min ṭawngtaisakna zarah hei leh chen hi ka thleng. MIZBA hruaituten engkim min buaipui ṭhin a, ka lawm em em a ni.
Boxing-a bul ka ṭan tirhin S. Rochama, Saron Veng in engkim ka mamawh leh ṭul zawng zawng zawng min buaipui a, thinlung takin lawmthu ka sawi. Boxing ka zir tirha ka coach hmasa ber Lalchhanhima, Armed Veng ka hre reng a, SAI ka zawm tirha theihtawp min chhuah puitu coach Vulṭhavunga nen an chungah ka lawm em em a ni.

Kum 2017 aṭang khan kan hnathawhna SSB hian Sete Boxing Academy-ah traning turin min dah a Sete-a'n ṭha hnem ngai tak leh hma ka sawn theihna turin traning ṭha tak min pe a, hma ka sawn phah hle.
Mizoram boxing coach zawng zawng te hian kan zin dawnin traning-te min pe ṭhin a, an za vai chungah ka lawm hle. Mizoram mipuite min ṭawngtaipuitute leh duhsakna min hlan tute zawng zawng chungah ka lawm em em bawk a ni. - Lalbuatsaihi (BS-i)