A match hmasa berah Thiem a tla
Dominic Thiem-a'n kawng dik a zawh ngei niin a lang hman, set hmasa pahnih a lak bakah set thumna an khelh laiin Pablo Andujar service chhuhsak theihna remchang a nei, point khat hmuh belh zeuh se chuan nuamsa taka chak mai tur a ni.
Mahse maw, beisei angin thil a kal zui lo. Set thumna hun pawimawh laiah a zawnin unforced error vawi li a nei! Match tir lama a chet ṭhatna ang kha neih let tumin bei ngial mah se a thei tawh lo, set hmasa pahnih a lak tawhna chu holam takin a thamral tir.
Pathianni zan French Open mipa singles inkhelah Thiem hi world number 68 Andujar nen darkar li leh minute 28 an inkhelh hnuah 4-6, 5-7, 6-3, 6-4, 6-4 in a chak lo. Tun hma lama final vawi hnih a khelh tawhna Roland Garros chu a mangṭha a ngai nghal der.
US Open 2020 champion Thiem hian Paris khawpuiah beisei ang result nei lo mah se, grass court inelna lian July thla a khelh tur Wimbledon lamah erawh thapui thawhin a inlan chhunzawm leh ang.
A mak a na
Thiem hi seeded palina pek a ni a, inelna hi clay court-a khelh a nih avangin champion tura rinkai a ni. Final kalkawngah Rafael Nadal, Roger Federer leh Novak Djokovic te an awm loh bawk avangin beisei a sang hman hle.
Mahse, kum 35 mi Andujar lakah rin loh takin a tlawm ta si. Andujar hian 2003 aṭang khan professional tennis a khel ve chauh. May thlatir lam khan Geneva Open-ah Federer a lo ngam tawh, tunah khawvel barakhaihin Thiem a hneh leh ta.
Austrian tlangval Thiem chuan, "Engkim mai kha ka nihna ang lo vekin a kal ta a ni ber. Ka ball vuak a na loin a kal dik lo ṭhin hle bawk, englai tak kha nge ka chak lohna lai ber ka la hrethiam lo, inkhel hi uluk takin ka la enlet ang," a ti.
Hnehna changtu Andujar chuan, "Kum 35 mi ka ni tawh a, eng chena rei nge ka inkhelh theih dawn a la hriat loh. Chuvangin French Open-a hnehna chan hi a hlu bik hle," a ti. A match lehpekah chuan Radu Albot leh Federico Delbonis te inkhela chak zawk a hmachhawn leh ang.
Zverev chak hram
Thiem ang bawkin Alexander Zverev kan mangṭha teuh hle. Greman tlangval hi Oscar Otte lakah a talbuai hman hle, mahse set hmasa pahnih a hloh hnuah 3-6, 3-6, 6-2, 6-2, 6-0 in a tho chhuak leh thei hram.
Madrid Open champion hian double fault vawi kua a nei a, world number 152 lakah hian a service vawi li a hloh bawk. Set thumna aṭang bik chuan Zverev hi dan rual lohin a khel ṭha, round sang lamah erawh chuan insiamṭhat a mamawh dawn.
Inkhel dangah seeded pangana Stefanos Tsitsipas chuan tualchhung tlangval Jeremy Chardy lakah 7-6 (8-6), 6-3, 6-1 in hnehna a chang a, second round-ah chuan Greek player hian Sebastian Korda emaw Pedro Martinez emaw a hmachhawn leh ang.
Mipa player langsar zinga mi Grigor Dimitrov pawhin chanchin duhawm lo a nei. World number 3 hlui hi Marcos Giron nen an inkhel a, set lina an khelh laiin hnungzâng na vangin a inhnukdawk - set hnih a la tawhin a dinhmun ṭha mah se a khel zui thei ta lo.
