Silva leh Tuchel tan contract thar

Champions League nomawi chawi hlim Chelsea an phur thar a, an defender pawimawh Thiago Silva chu kum khat dang contract thar an ziahpui dawn niin khawthlang media-ten an tarlang.

Silva hian season ṭan dawn khan free transfer-in Blues hi a zawm a, kum 36 mi a nih ve tawh avangin London club hian kum khat chhung atan bak contract an ziahpui ngam lo.

Mahse, season an hman zawh meuh chuan Silva hi hruaitu ṭha a nihna piah lamah Blues tan tlarhnungah ban rinawm a ni a, inelna hrang hrangah match 34 khela goal hnih khungin Champions League nomawi a chawipui hial a ni.

European football transfer expert Fabrizio Romano chuan, "Thomas Tuchel leh Thiago Silva-ten contract thar an ziak dawn a, puanzar thuai a ni ang," tiin social media lamah a pholang.

Chelsea boss Tuchel pawh hian contract thar a ziak ngei dawn niin The Guardian chuan an tarlang a, Frank Lampard a thlak tirha thla 18 chhung atana contract ziaktu coach hian kum 2023 thleng cham turin contract a ziak ang a, a ṭul dan a zirin kum khat dang pawhsei theih tur a ni ang.

Silva leh Tuchel hian he thuziak i chhiar meuh chuan contract an ziak fel tawh hial mai thei a, Chelsea tana midfielder pawimawh N'Golo Kanté chu contract thar ziak tur anga tarlan a ni bawk.

Fabrizio Romano chuan, "Kante hi contract thar zawrh a ni dawn a, London-a a hlim bakah club chhungkua hian an ngaina em em vek a, hmanhmawh taka chet erawh an tum lo," a ti a, Kante contract thar chu thil chiangsa a nih thu a sawi.

Kum 30 mi Kante hian season hman zawh takah khan Chelsea tan inelna hrang hrangah match 48 a khel a, assist vawi thum a nei - team tana French midfielder thiamna leh ṭangkaina erawh statistic hmanga teh chi a ni lo.