Copa America - A thlengtu tur an awm rih lo!

Euro 2020 khel tura an inbuatsaih mup mup laiin Copa America lam erawh an la inchingfel thei rih lo - an buai tual tual emaw tih zawk tur a ni.

South America khawmualpuia ram leh ram inelna sang ber hi Argentina chu thleng tura ngaih an ni a, mahse, inelna ṭan nan kar hnih chauh a awm tawh tihah Covid-19 vangin Argentina chu inelna thlengtu tur an nihna chu hlihsak an ni leh ta!

Nikuma neih tur, Covid-19 vanga neih theih loh inelna hi kumina neih turin sawn a ni a, a tirah chuan Argentina hi Colombia nen inelna thleng tura tih an ni.

Mahse, Colombia ramah dodalna a nasat avangin Argentina chauhin an thlen tura tih a ni a, tunah hlihsak an ngai leh ta zui - nizan lam khan South American football a thuneitu sang ber CONMEBOL chu an inhmukhawm a, he thu buatsaih a nih lai hian an thutlukna hriat hman a la ni lo.

Buaina hmasa
Copa America hi a tirah chuan Colombia leh Argentina-ten an inthlen ṭawm tura tih a ni a, mahse, Colombia ramah dodalna nasa tak a awm avangin May thla tawp lam khan CONMEBOL chuan Colombia chu inelna thleng thei loah a ngai a, November a inelna sawn mai tura ngenna chu thil theih lohah an ngai.

Colombia sorkar hian tun hnaiah an ram mipuite chhiah chawi dan tur chu an siamthar a, hei hi Covid-19 vanga ramin sum lama harsatna nasa tak a tawh mek sutkian nan a nih thu an sawi.

Mahse, April thla aṭang khan Colombia mipui tam tak chuan an duh lohna an lantir tawh a, Copa Libertadores match ṭhenkhat chu an tibuai hial - he chhiah dan thar hi Colombia sorkar chuan a hlip zui a, mipui erawh an ngawih phah lo.

Colombia rama ṭhalaite tana hna tlem lutuk te, police ho hleilenna leh hlawh tlem lutukte chu dodalin mipuiin an lungawi lohna an lantir zui a, mi 80,000 chuangin Covid-19 vanga an nunna an chan bawk avangin CONMEBOL chuan inelna nghahna chiah an ngai lo.

Hei le Argentina
Colombia-in inelna an thlenpui theih dawn tak lohah chuan Argentina an lo lang vat a, South America khawmualpui inelna chu mahnia thlen mai an dil - an dilna pawmsak an ni a, mahse, tunah erawh hlihsak an ni leh ta!

Argentina-ah hian tun hnaiah Covid-19 hri a leng nasa a, nimin thleng khan mi 80,000 dawnin he hri leng avang hian an nunna an chang tawh. Argentina mipui tam takin hetiang hri leng buaina kara football inelna thleng chiah an inngai lo.

Uruguay striker Luis Suarez chuan mipuite himna leh hriselna chu ngaih pawimawh hmasak a ṭul thu a lo sawi tawh a, CONMEBOL tan huaisen taka Copa America kaltlangpuina chi a ni lo.

South American football thuneitu sang chuan inelna thlen duhte dilna an enfiah mek thu an sawi a, he thuziak i chhiar meuh chuan Copa America 2021 thlengtu tur hi a chiang leh tawh mai thei.

Inelna chu
Copa America hi June 14 aṭanga khelh ṭan tura ruahman a ni a, July 11 thleng khelh a ni dawn - South America hnuaia ram 10-ten inelna hi an hmachhawn ang.

Ram 10-te hi group A leh B-ah ṭhen hran an ni a, team panga ve ve an awm ang - an inkhelh kual vek hnuah table mawngphah luahtu ve ve an tla ang a, team pariatin quarterfinal an khel zui ang.

Group A-ah hian Lionel Messi telna Argentina, Bolivia, Uruguay, Chile leh Paraguay an awm a, group B-ah hian Colombia, Brazil, Venezuela, Ecuador leh Peru an awm thung - group pahnihah team chhia tia sawi tur an awm lo.

Match hmasa ber hi Argentina leh Chile-ten June 14, zing dar 2:30-ah an khel dawn a, July 11, zing dar 5:30-ah final khelin inelna hi khar a ni ang.

A zing mah mah!
Copa America hnuhnung ber hi kum 2019 khan khelh a ni a, Brazil an champion - nikum khan khelh leh tur a ni a, mahse, Covid-19 avangin kuminah sawn a ni. South American football-a ram leh ram inelna, heti taka khelh zin a nih chhan hi CONMEBOL lamin Euro ruala inelna kalpui an duh vang a ni a, he thu hi kum 2018 khan an puang.

Kum 2007 aṭang khan inelna hi kum li danah neih ṭhin a ni a, 1987-2001 inkar khan kum hnih danah neih ziah a ni a, 2001-2007 inkar khan kum thum danah neih a ni thung. Kum 2007 hnu khan kum li danah neih ni lehin 2015 khan Chile-ah khelh a ni.

CONMEBOL leh Copa America kum 100 tlin lawm nan kum 2016 khan khelh leh a ni a, kum 2019 khan 2015-a neih tawh aṭanga chhiar ṭha lehin kum li dana neih kalphung zawmin an nei leh.

Euro kalphung zawm a nih dawn takah chuan CONMEBOL hian 2024 thleng an nghah a ngai dawn - hei chen chen nghah ngai loa inelna kalpui dan tur an ngaihtuah a, kum 2020 a neih turin an rel ta. Mahse, hri leng vangin kum 2021-ah sawn a ni leh ta a, Euro khelh hunah zel Copa America hi khelh a ni tawh ang.