Lakers chak loh laiin Nets an chak

NBA champion lai Los Angeles Lakers an kal fawr hleithei lo. Nimin zing playoff inkhelah Lakers hi Phoenix Suns lakah 100-92 in an tlawm a, match sarih khelh tur zinga match li an khelh tawh chinah team pahnih 2-2 in an inhneh-tawk mek.

Inkhel dangah Brooklyn Nets chuan Boston Celtics chu 141-126 in an lo hneh ve thung, champion tura rinkai Nets hian best of seven series-ah 3-1 in hma an hruai a, tlang turin match khat chak chauh an hmabak tawh.

Eastern Conference lamah hian Milwaukee Bucks chuan Miami Heat 4-0 in an sawp tawh. Conference semifinal-ah chuan Nets leh Bucks an inhmachhawn ngei dawn niin a lang ta, a hmuhnawm dawn.

Inkhel dangah Los Angeles Clippers chuan Dallas Mavericks 106-81 in an hneh a, 2-2 in an inhnehtawk mek. Atlanta Hawks chuan series kal laia 3-1 a hma an hruai theih nan New York Knicks 113-96 in an hneh ve bawk.

Lakers an chelh
LeBron James leh Anthony Davis awmna an nih vangin Los Angeles Lakers hming a lian. Mahse regular season an hman dan chhut erawh chuan Phoenix Suns hi dah hniam theih an ni lo.

Nimin zing Staples Center-a inkhelah pawh Suns hi an talbuai duh lo, quarter hmasa leh a hnuhnung berah hniam zawk mah se - quarter thumna bikah Suns hi point 13 ngawtin an sang fal zawk a, an dinchan theih chhan a ni.

Suns tan mimala cheṭha fal an awm lo. Mahse, player paruk ngawtin point 10 chuang an nei thei vek a, ven sen an ni lo. Lakers tan James-a'n point 25 nei mah se thlawptu a nei ṭha tawk lo a, semifinal lut tur chuan ṭan mar a ngai tawh hle ang.

Lakers hian quarter hnihna lekah Davis chu khel bawr hliam vangin an chan, an player pawimawh awm loh a lang viau. Davis hi engtia rei nge a chawlh dawn tih hriat a ni lo. Nilaini zing dar 7:30-ah game 5 an khel chhunzawm leh dawn a ni.

Nets an thiam
Kevin Durant, Kyrie Irving leh James Harden an neih miau avangin Brooklyn Nets tan harsatna a awm lo. Nilaini zingah game 5 an khel leh dawn a, game khat chauha hnehna la chang Boston Celtics tan chak ngei ngei a ngai tawh dawn.

Nets tan hian Durant-a'n point 42 a nei a, basketball a khelh hun chhungin playoff chinah vawi 12 zet point 12 chuang a nei ta. Ani bakah hian point 39 neitu Irving leh Harden (23 point) te hmangin nuamsa takin hnehna an chang.

Nimin zing inkhel hi a hmuna entu an awm a, fans zinga mi ṭhenkhat chuan Irving hi tui bottle hmangin an vawm a, mahse a fuh lo hlauh. Kar hmasa pawh khan inkhel entu zinga mi panga chu an chet mawi loh vangin hrem an lo ni tawh.

Irving chuan, "Mipui tana hmuhnawm siam tur leh ti hlim turin kan inkhel a, sahuana ramsa ang maia min en ṭhin hi chu a dik lo," a ti. Durant pawhin entu lamin hmasawnna tur an nei nia a hriat thu a sawi ve bawk.