KDB-a'n a hnar leh mitah hliam a tuar

Manchester City midfielder Kevin de Bruyne chuan Champions League final-a Chelsea an hneh loh ṭumin a hnarah leh mitah hliam a tuar a, Belgium international chuan ngaihtuahawm erawh a nih loh thu a sawi.

KDB chuan, "Ṭhiante u, damdawi in aṭangin ka chhuak tawh a, ka hnar ruh leh mit ko ruh lamah harsatna ka tawk ve deuh a ni. Tunah erawh ka ṭha tawh a, kan inkhel result avang erawh chuan hrehawm ka ti takzet a, mahse, kan lo kir leh em em ang," tiin twitter lamah a ziak.

Kum 29 mi Kevin de Bruyne hi Chelsea defender Antonio Rudiger nen an intauh palhna lama inhliam a ni a, minute 60-naah Gabriel Jesus chuan a thlak a ngaih phah hial.

Rudiger pawhin Belgian midfielder chu dam thuai tura a duhsak thu social media lamah a pholang a, German defender chuan, "De Bruyne inhliam chu pawi ka ti takzet. Ka tih luih a ni lo a, Kevin pawh a hranpain ka be thlap tawh e.

"Dam thuai turin ka duhsakna ka hlan a, khelmualah kan hmuh leh thuai ka beisei," a ti a, KDB chu a duhsakna a hlan.

June 11-ah Euro 2020 khelh ṭan a ni dawn a, KDB hi Belgium squad-ah a tel - Belgium hi group B-ah Denmark, Finland leh Russia-te nen an awm ho a, an match hmasa ber hi June 12 zanah Russia nen an khel dawn.

Belgium fan-te chuan thin phu dep depin KDB dinhmun hi an ngaichang reng ang tih a chiang a, City midfielder hian a dam ṭhat tawh thu sawi mah se khelmuala inlan tur khawp erawhin a la dam lo ang tih a chiang - 100% fit-a Euro a khel thei lo a nih ngat chuan Belgium tan channa nasa tak a ni ang.