Poch a chhuak dawn lo - PSG director

Paris Saint-Germain sporting director Leonardo chuan tun hnaia a club hlui Tottenham Hotspur leh Real Madrid nena sawizawm hlawh mek Mauricio Pochettino chu a chhuah loh tur thu a sawi a, Spurs tan thu hriat nuam a ni lo ang.

Spurs hian April khan an coach Jose Mourinho chu a hna aṭangin an chawlhtir a, November 2019-a an ban tak Poch-a lam bawk an hawi nawn - mahse, an coach hlui hi an chang tawh dawn lo a ang hle.

Leonardo chuan, "Poch hian PSG-ah kum hnih contract a la nei mek a, a hnathawhah kan lawm em em a ni," a ti a, league nomawi an chawi loh avanga an manager dinhmun him lo anga sawi pawh a dik lo niin a lang.

Hetihlai hian football journalist lar Guillem Balague chuan, "Poch hian England-a kir leh ngei chu a duh a, mahse, tun atan a ni lo. PSG thuneitute nen season thar an hmachhawn dan tur an buaipui leh tawh zawk a ni," a ti.

Real Madrid chuan Zinedine Zidane a ban takah chuan a hmun ruak luah turin Poch hi an duh viau nia sawi a ni a, Santiago Bernabeu lam hian PSG thuneitute biak ngei an tum.

Mahse, Balague chuan, "PSG hian Poch chhuahtir tumna an nei lo a, an rilruah pawh an la ngaihtuah chhin loh chanchinin titi a luah nasa lutuk hi mak an ti zawk a ni," a ti!

Player a nih laia PSG tana lo khel tawh Poch hian January khan Thomas Tuchel an ban hnuin French club hi a zawm ve chauh a, league nomawi a chawi thei lo chungin French Cup leh Super Cup-ah erawh nomawi a chawi thung.

Balague chuan, "League nomawi a chawi loh avangin PSG hian an dem reng reng lo a, an squad hian nasa takin hma an sawnah an ngai zawk a ni. Season tharah pawh an coach ni zel turah an ngai nghet hmiah," a ti a, Spurs leh Real-in Argentine coach hi an chan loh hmel hle.