Italy-ah Quartararo a tlan chak ber
Pathianni zana tlan zawh tak MotoGP Italian Grand Prix-ah Fabio Quartararo chu a hmasa berah a thleng. Yamaha rider hian championship table lamah pawh a hmahruaina dinhmun a sawhnghet chhunzawm nghal bawk.
Mugello-ah Quartararo a chungnung a, pahnihnaah Miguel Oliveira thlengin pathumna chu Joan Mir a ni thung. Bike intlansiakna sang ber hi Inrinni lama Jason Dupasquier thihna in a la luah hneh a, hnehna a chan pawh hi Dupasquier tan a hlan.
Inelna zawh hnuah Quartararo hian Dupasquier hming chuanna helmet a khum a, a ṭhianpa thi ta Jason te ram Swiss hnam puarzar (flag) la chhuakin a tan hun tawite a hmang.
Thihna chu
Inrinni khan Moto3 huangah bike pathum an chesual a, chetsualna thlengah hian Jason Dupasquier chu bike dangin an ti palh na deuh a, Florence hospital panpui ni mah se a nunna an chhan thei lo a ni.
MotoGP chuan thu chhuah siamin, "Damdawi lam thiamte leh anmahni puituten theihtawp an chhuah a, a dam leh theih nan an theihna zawng zawng hlan mah se Swiss rider Dupasquier chu chhan theih a ni ta lo.
"Keini MotoGP chhungkua chuan chhiatna thleng hi pawi kan ti takzet a, a kalsan tak a chhungte kan tawrhpui takzet. Jason thlamuang takin chawl ang che," tiin thlahna thu an sawi.
Inelna
Pathianniah bike intlansiakna sang ber MotoGP neih zui a ni a, intlansiak neih hmain Jason sunna hun hman hmasak phawt a ni. Season duhawm hmangtu Quartararo chu nidang ang bawkin a tlan ṭha leh hle a, hasatna lian tham a tawk lo.
Quartararo hi amah hnaih bertu Oliveira aiin second hnih chuangin a thleng hmasa zawk a, champion lai Mir-a tan pawh tih theih dang a awm lo. Championship lama Quartararo elpui Johann Zarco chu palinaah a thleng.
Hnehna a chan hnuah Yamaha rider chuan, "Hnehna ka chang a, mahse ka ṭhian pakhat chu ka chan bawk si, lawmna tawng mah ila tunah chuan lungngaihna a lian zawk. Jason thih thu hriat hnua intlansiak kha a harsa ka ti takzet a ni.
"A nihna takah chuan kawng kawi pakuana kan thlen khan Jason kha ka hre chhuak zel, tuna hnehna ka chan pawh hi atan ka hlan," tiin an chetsualna laiah a ṭhianpa a hriat chhuah ṭhin thu a sawi.
A awlsam lo
Season kal laia a vawi hnih nan Joan Mir chu dawhsanah (podium) a lawm a, tun ṭum erawh nidanga hlim hmel a put ang kha a ni lo. Dupasquier thihna chuan a rilru a tih hrehawm thu a sawi chhuak.
Suzuki rider Mir chuan, "Intlansiakna huangah hian thil tam tak a thleng thei, a la thleng zel bawk ang. Ṭhenkhat chu kan theihnghilh mai laiin a ṭhen erawh duh lo chung pawha kan hriatreng tawh tur a awm thung.
"Jason chunga thil thleng hi pawi ka ti takzet, a chhungte ka tawrhpui takzet a ni. Infiamna huangah chuan kan elpui chu tu pawh ni se kan zah hle tur a ni tih pawh ruilruah a rawn thar nawn leh a ni," a ti.
Tun season MotoGP hi intlansiak vawi 19 awm thei tura beisei mek a ni tawh a, tun thlengin inelna vawi ruk an nei tawh. Intlansiak pasarihna atan June 6, Pathianni hian Catalan Grand Prix an tlan leh ang.
