Real-in ka chungah rinna an nghat lo - Zidane

Zinedine Zidane chuan Real Madrid a chhuahsan chhan tun hnaiah a sawi chhuak a, French coach hian fan-te hnena lehkha a thawnnaah Madrid khawpui a chhuahsan chhan chu rin a hlawh tawk loh vang a nih thu a sawi.

Zidane chuan, "Club-in ka chungah rinna an nghah tawh loh avangin ka chhuak a, tun leh nakin atana team dinna kawngah min ring tawh lo a ni. Football hi ka hrethiam a, Real Madrid-te ang club lian aṭanga beiseina pawh ka hrethiam a, beisei ang result a awm loh chuan chhuak mai tur kan ni.

"Mahse, chumi piahlamah chuan hriat tel tur thil tam tak theihnghilh a ni a, ni tina he team tana ka hnathawhte, player leh he club ropui taka hnathawk mi 150-te nena kan inlaichinna ka siamṭhatte hi hmuh tel a ni lo.

"Nomawi chawi duha tuihal reng ka ni a, he hmunah hian nomawi chawi turin ka lo kal a ni. Mahse, chung zawng zawng aia pawimawh chu mipuite an ni a, mahse, heng thilte hian ngaihsak a hlawh tawk lo," a ti a, Real chu nomawi lo thil dang ngaihtuah nei loah a puh.

Kum 48 mi coach hian Real-a enkawl hmasak khan a zawnin Champions League nomawi pathum a chawipui a, La Liga (1), Spanish Super Cup (1), UEFA Super Cup (2) leh FIFA Club World Cup (2) ah a champion pui bawk.

Zidane chuan player leh coach a nihna anga Real-a hun a lo hman tawh chu a nuna thil hlimawm lai ber a nih thu a sawi a, club president Florentino Perez chunga a lawm reng tawh tur thu a sawi bawk.

French coach chuan a hnathawh avanga zah a phut thu sawi zuiin, "Kan thawhhona avanga kan hlawhtlinnate avang khan zah nih ve ka phut a, tun hnaia club leh President nena kan inlaichinnate pawh, coach dangte nen ang mai ni loin, kha aia ṭha zawk a nih kha ka beisei a ni.

"Midang aia chungchuang taka enkawl ka beisei a ni hran lo a, ka hnathawhte tlem azawng chu, hriatreng sak ka duh ve mai a ni. Tun hnaiah hian club liana coach-te cham chhung hi season hnih lo liam hi a ni lo tlangpui a, hei aia rei zawk daih tur chuan mihring inkungkaihna hi ngaih pawimawh hmasak a ṭha a ni.

"Chu chu sum leh hmingthanna aiin a pawimawh a, eng dang zawng aiin a pawimawh zawk. Chutiang a nih avang chuan media lamah, match khat chak loh vanga ban ka nih theih thu ka chhiar hian ka na ṭhin a ni," a ti.

Zidane chuan, "Khawvela coach ṭha ber ni lo mah ila, player a ni emaw, coaching staff a ni emaw, club hnathawk dang an nih pawhin an tih tur atana an mamawh em em inrintawkna ka pe thei ṭhin," a ti zui a, club tana a hnathawh theihnghilh a duh lo.

Player a nih lai pawha khawvela ropui ber pawl ni thei Zidane hian media lam pawh thu chah zuiin, "Football-in a ken tel buaina leh thil dang aiin football chungchang hi sawi nasa zawk ila, football hi hmangaih takin i enkawl ang u," a ti.

Zidane hian Real hi March 2019 khan a vawi hnih nan a enkawl leh a, La Liga leh Spanish Super Cup nomawi pakhat ve ve a chawipui leh hman - season hman zawh tak erawh nomawi chawi nei miah loin a khar.

Real-ah hian kum khat dang cham turin Zidane hian contract a la nei a, mahse, Santiago Bernabeu-a cham chhunzawm aiin chhuah a thlang ta zawk a ni.