Bergwijn-a season a tawp

Mangchhiain Totten-ham a kiansan hleithei lo a, January-a pound maktaduai 27 senga an lakluh Steven Bergwijn chu ke rek hliam vangin tun season-ah a inlan theih a beiseiawm tawh lo. 

Spurs hian an player pawimawh Harry Kane leh Son Heung-min chu hliam vangin an chhawr thei lo mek a, midfielder Moussa Sissoko chu January 1 aṭang khan an chhawr thei lo tawh bawk. Tottenham chuan Bergwijn hi rei tak chhung atana enkawl a nih tur thu an sawi a, a hun rei zawng tarlang lo mah se coach Jose Mourinho chuan a player hi tun season-ah a inlan a rin tawh loh thu a sawi a ni. 

January 1-a inhliam Kane hian social media lamah a ṭhat chhoh mek thu a sawi a, mahse English striker hi tun season-ah a inlan thei ang em, tih chu a chhanna pek harsa tak a la ni rih. February 16-a Aston Villa laka inhliam Son hi tun season chu inlan tawh lo tura ngaih a ni a, Sissoko chuan ṭhat lam a pan mek thung.