Miami Open kaltlangpui dawn

Tun thla tawp lama neih tur tennis inelna Miami Open 2020 chu ruahman lawksa angin kaltlang pui a ni dawn a, season kal laia Masters Tournament an khelh hmasak ber a ni ang.

Tun kar aṭanga khelh tur Indian Wells erawh coronavirus vangin ṭhulh a ni tawh. Miami Gardens, Florida-a inelna neih tur Miami Open pawh hi neih loh tur angin thuthang a awm hman. Mahse, inelna buat-saihtu lam chuan an kaltlangpui theih ngei an beisei. Tournament-ah hian ram hrang hrang 40 aṭangin infiammi an fuankhawm ang. Miami Open chuan thuchhuah siamin, "Inelna hi March 23 aṭanga April 5 chhunga neih tur a ni.

"Tun dinhmunah chuan ruahmanna awmsa hi tih danglam a awm lo. Player, fans leh tournament neih theih nana inhnamhnawih zawng zawngte hriselna chu kan ngaih pawimawh a ni a, endikna pawh uluk taka neih a ni ang," an ti.

United States rama inelna neihah hian entu kal khawm hi mi 4,00,000 vel lai an ni ṭhin, kuminah erawh season dang nena khaikhinin entu lam hi an kiam deuh a nih pawhin a mak lo ang. Kuminah hian mipa singles champion lai Roger Federer chu a khup hliam vangin a inlan thei dawn lo, world number 1 Novak Djokovic leh Rafael Nadal te erawh an inlan ang; hmeichhe champion Ashleigh Barty erawh a inlan thei ang.

Spain tlangval Nadal chuan, "Hri leng vanga Indian Wells kan khel thei lo chu a pawi hle, tunah hian tournament dang pawh eng tiangin nge an kalpui dawn tih hi kan thlir ṭhup mai a ni.

"Harsatna hi a sut-kianna an hriat thuai ka beisei, chumi hma chuan mitin mahni awm hmunah ṭheuh him taka lo awm turin ka duhsak che u," a ti. Nadal hian 2007, 2009 leh 2013 khan Indian Wells title hi a lo la tawh.