FRENCH OPEN 2021: French Open aṭangin Osaka a inhnukdawk

"French Open-ah chuan media ka hmachhawn dawn lo, pawisa chawi a ngai a nih pawhin ka chawi ang a, chu pawisa chu rilru lama harsatna neite tana thawhlawm a ni nghal mai," tiin inelna neih hmain a sawi a, a nghawng chu na tak a ni.

Naomi Osaka chu French Open 2021 khelh lai aṭangin a inhnukdawk. Japanese nula hian a sawi lawk ang ngeiin media a hmachhawn duh lo a, tournament buatsaihtu lam pawhin an tih tur dik tak an ti zui ve nghal.

Osaka hian a match hmasa berah Patricia Maria Tig a hneh a, inkhelh zawha press conference neih ṭhinah a inlan lo. French Open chuan Osaka hi £10,570 an chawitir a, match lekpekah media a hmachhawn loh chuan paih (disqualify) theih a nih thu an sawi bawk.

Second round-ah Osaka hi Ana Bogdan nen inhmachhawn tur an ni, mahse a inkhel tawh dawn lo - ama thuin a inhnukdawk. Grand Slam buatsaihtu lamin dan leh hrai an neihsa tih danglam an tum loh avangin atan duh thlan tur dang a awm lo.

Harsatna chu
Tunlai hmeichhe tennis player zingah Osaka hi a ṭha berte zinga mi a ni a, kum 23 mi chauh ni chungin Grand Slam nomawi pawh pali a chawi der tawh - Australian Open leh US Open title pahnih ve ve a la tawh.

Player ṭha tak ni mah se French Open leh Wimbledon-ah a che ṭha ngai lo. Clay leh grass court-ah hian a thlen san ber pawh third round chauh a ni, hei vang hian sawisel a hlawh fo, kuminah hian hmasawn tumin bei viau mah se inelna tenau zawkah beisei a la phak chuang lo.

Inkhelh zawh hnua media lamin an duh duh an zawt ṭhin chuan a nunah nghawng a neih thu a sawi a, rilru lam damlohna a nei hial tih a sawi. Hei vang hian French Open atan pawh media hmachhawn hi a hreh nia sawi a ni.

Osaka hian ṭan chhan mumal nei loa thil ti satliah a ni bik lo, tun hma lam aṭanga kalphung nghet lo awm tawhsa chu atan phurrit a ni a, thlak a nih loh pawhin siam danglam theih beiseiin thutlukna lian tak a siam.

Hmanah chuan...
Wimbledon 2019 kha a ni a, US Open leh Australian Open champion ni chungin Osaka a inlan. Mahse, All England Club-ah hian a match hmasa berah Yulia Putintseva a ngam lo, player langsar lo zawk lakah set la miah loin a tla.

Media a hmachhawn zui a, journalist pakhat chuan hun rei lote chhunga milar nih hluai chu nun insiamrem a harsa em? tiin a lo zawt a, Japanese nula hian a chhang thiam lo, lungchhe takin a awm a, engmah sawi thei loin a kal sawn.

Press conference neih hi thil awlsam a ni lo. Mahse, Grand Slam dan leh hraiah chuan player-ten media an hmachhawn tur a ni a, an hmachhawn loh chuan vawi khat inlan lohah £14,160 thleng an chawi thei tih a ni thung.

Hmeichhe tennis thuneitu sang Women's Tennis Association (WTA) pawhin, "Tournament khelh lai chuan player ten media an hmachhawn tur a ni a, media kaltlangin fans leh midang tan thu an puang chhuak ang," tih chu an kalphung a ni ve bawk.

Ka suangtuah phak loh thil - Osaka
Press ka hmachhawn loh tur thu ka ziah lai kha tun huna hetiang a thleng tur hi ka ngaihtuah phak lo. Ngun takin k ngaihtuah a, ka player pui leh midang te ngaihtuahna la peng lo tur leh Paris khawpuiah tennis chauh an ngaihtuah theih nan inhnuhdawh mai hi a ṭha ka ti.

A nihna takah chuan US Open 2018 hnu lamah khan rilru lam harsatna ka nei a, hei hian hun harsa min hmachhawntir fo. Tun hi hetiang puan chhuahna hun a ni lo a, midang tih buai theih a ni tih pawh ka hria.
Min hrechiangtu leh tournament ka khel lai ngun leh chik taka lo en ṭhinte chuan headphone hmangin hla ka ngaithla ṭhin tih an hria ang, hei hian ka rilru ipik leh hrehawm a tih ziaawm theih ka beisei ṭhin.

Journalist hi an inang vek lo, mi zaidam leh min hrethiam em emtu pawh an awm, an lakah ngaihdam ka dil. Mi hmaa thusawi chi ka ni lo a, chu bakah media ka hmachhawn hma hian rilru lamah buaina ka nei ṭhin tih min hriatsak ka duh.

Paris khawpui ka thleng a, rilru lam nawm lohna chuan min kiansan si lo, hei vang hian media hmachhawn loh kha ka tana ṭha ber tura ka ngaih a ni. Dan leh hraiah chuan media hmachhawn ngei a ngai tih ka hria, chumi hre chung chuan kan hriat thar nan tih lan kha ka duh a ni.

Tennis court pawn lamah hun ka hmang rih dawn a, hun ṭha a herchhuah hunah chuan ka lo kir leh ang, chumi hunah chuan - player, press leh fans tana thil ṭha ber tur kan sawiho theih ka beisei.

Mipui an thuhmun fo thei lo
"A nihna takah chuan press conference ṭhenkhat hi chu a nuam lo, a bik takin chak loh hnuah a hrehawm zual. Mahse, hei hi chu infiamna in a ken tal leh kan nuna bet a ni a, kan ti lo a nih chuan pawisa kan chawi thei. "Rilru lam harsatna hi chu kan ngaihthah deuh a ni mai thei, a bik takin hrileng karah phei chuan harsatna hi a tam. Player ten engtawl leh zalen zawka thil kan tih theih hi a pawimawh." - Novak Djokovic, world number 1

"Osaka thutlukna hi ka zah, a mimal leh infiammi a nihna ang pawhin a ngaihdan hi a zahawm hle. A dinhmun ka hriatthiampui rual hian kei chuan ngaihdan dang ka nei, media hi kan infiamna atan hian a pawimawh.
"Media tel lo chuan tuna kan hlawhtlinna leh thil tihte hi a ropui thei lo, kan chanchin min ziahsaktu awm lo se la chuan tun dinhmun hi kan thleng phak lo ang." - Rafael Nadal, French Open mipa champion

"Chak loh hnuah media hma-chhawn hi chu hrehawm tak a ni, court chhungah eng nge kan tawn min hriat pui vek si lo. Mahse media hian kan rilrua awmte puanchhuah theihna hun min pek avangin an pawimawh hle. "Media an pawimawh a, chutih rualin mihring dinhmun a inan vek loh avangin thil inbuk tawk chu ka hriat a ngaiin ka hria," - Iga Swiatek, French Open hmeichhe champion

"Naomi Osaka chungchanga thil thleng hi a pawi ka ti hle, a dam ṭhat leh thuai ka duhsak. Infiammi kan nih chuan kan taksa hriselna ngaih pawimawh a ngai, chutiang bawkin rilru lam pawh a pawimawh. "Tuna thil thleng hi chu media hmachhawn duh loh vang ngawr ngawr niin ka hre lo. Naomi lo ṭha leh thuai rawh, i tan kan awm reng." - Martina Navratilova, 18-time Grand Slam singles champion

"Roland Garros aṭanga Naomi Osaka inhnukdawk hi a pawi takzet. A rang thei ang bera dinhmun ngai a awh leh theih nan duhsakna kan hlan, nakkumah chuan a rawn inlan leh ngei kan beisei tlat a ni." - Gilles Moretton, French Tennis Federation president