Barca an inthuam ṭha - Aguero leh Garcia an lalut

Copa del Rey nomawi chiah chawi chunga season an khar hnuah Barcelona-in thuam ṭhat hna an thawk a, an striker lakluh hmasak ber chu kum 32 mi Sergio Aguero a ni.

Argentine striker ropui hian a hming chherna Manchester City kum 10 hnuah a chhuahsan a, Catalan club-ah hian kum hnih chhung khel turin contract a ziak. Aguero chuan, “Barcelona hi khawvela club ṭha ber a ni tih chu kan hre vek a ni,” a ti a, City fans tam tak tan thu hriat nuam a ni lo ang.

Barca hian Manchester City aṭang vekin Eric Garcia chu free transfer-in an lalut bawk a, Spanish centre back hian Nou Camp-ah kum nga chhung khel turin contract a ziak.

A hming Aguero
Aguero-a’n City tan kum 10 a khelh chhungin inelna hrang hrangah match 390 khelin goal 260 a khungsak a, City tana goal khung hnem ber record a siam - nomawi lian tham 15 a chawipui hman.

Argentina international hian Premier League (5), FA Cup (1), League Cup (6) leh Community Shield (3) nomawi a chawi a, “Champions League nomawi ka chawi hma chuan City ka chhuahsan lo ang,” ti mah se tun season final-ah Chelsea an ngam lo a, European football a nomawi ngaihhlut ber nei lo chungin Barca a pan.

Aguero hi Premier League goal khung hnem palina a ni phak a, English mi ni loah phei chuan a khung hnem ber - January 2020 khan Premier League-a hattrick siam hnem ber record Alan Shearer-a siam chu a khum a, vawi 12 ngawt City tan match khata goal thum khung tlin a nei.

Chelsea chuan Argentine striker hi lakluh tumin an hel ve bawk nia sawi a ni a, mahse, kum 2011-a pound maktaduai 36-a Atletico Madrid aṭanga City zawmtu striker hian a lo khelh tawhna league lama kir a thlang.

Hmasawnna
Atletico tana La Liga match 175-a khelha goal 74 khungtu Aguero chuan, “Barca pan tura thutlukna ka siam hi ka tifuh viauin ka inhria a, ka career-a hmasawnna a ni.

“Ka hlim takzet a, nomawi kan chawi theihna turin ka ṭangkai theih ka beisei,” a ti a, kut ruaka Nou Camp chhuahsan a tum lo - Aguero contract-ah hian a lei duh tan pound maktaduai 86 thehchhuah a ngaih tur thu a inziak tel.

Aguero-a’n Barca a pan tak avangin Lionel Messi chu Barca-a cham chhunzawm tura ngaih a ni a, Aguero chuan ram tana a khelhpui a ṭhianpa nen hian an inbiak ngei thu a sawi.

Barca striker thar chuan, “Messi nena inkhelh dun ka châk a, thutlukna erawh amah leh club kuta awm a ni. Ram tana ka khelhpui a ni a, ani nena khelh dun hi nuam ka ti takzet. Barca-ah a cham hram ka beisei a, a cham chuan club tan kan theihtawp kan chhuah dun dawn a ni,” a ti.

Messi chhehvel
Season ṭan dawn khan Messi hian Barcelona chhuahsan a lo dil tawh a, mahse, court-a amah siam liantu club khin a duh loh avangin Nou Camp-ah lung si lo zetin a cham chhunzawm - tun thla tawpah a contract a zo tawh dawn.

Messi hian tun thlengin contract thar a la ziak lo a, Barcelona president Joan Laporta chuan Argentine forward hi contract thar an zawrh ngei tur thu tun hnaiah khan a lo sawi tawh - chelh hram dan an ngaihtuah.

March thlatira Barca President atan thlan a nih dawna Messi a chelh tur thu uar taka sawitu Laporta chuan, “Kan phak tawk contract kan zawrh ang a, a pawm hram kan beisei. Kan inkarah boruak chhia engmah a awm lo a, Barca a hmangaih em em bawk - he hmuna cham zel tur hian kan duh a ni,” a ti a, Messi chuan hmun dang aṭangin sum tam zawk hmu thei ma h se an dawrna chu a pawm ngei a rin thu a sawi.

Spanish football expert Guillem Balague chuan French club hausa Paris St-Germain chuan Messi contract chu uluk taka an zirchian mek thu a sawi a, Manchester City hming a ri ring viau bawk.

Ka lo haw
Spain tana vawi sarih inlan tawh Eric García-a’n Barcelona tlarhnung pawp thawm ṭha turin Nou Camp-a kir a thlang a, Ronald Koeman enkawlna hnuaiah hmun pawimawh chan phak a beisei ang.

Kum 20 mi defender hian Barcelona-ah a career a ṭan a, kum 2017 khan Catalan club hi chhuahsanin Manchester City youth team a zawm a, kum 2018-ah senior team tan a inlan ṭan a, season thum chhungin inelna hrang hrangah City tan match 35 a khel.

Garcia hian season hman zawh takah khan City tan inelna hrang hrangah match 12 a khel ve hram a, heng zinga match thumah chiah hian inkhel bul a ṭan - season hman zawh taka a match kheh zat aṭanga teh chi erawh a ni lo.

Garcia hian 2019-20 season khan City tan inelna hrang hrangah match 20 a khel a, hliam vanga City an buai season-ah hian first choice centre back ni chungin season a khar -Barca tan chuan a thlawna laklet theih hi duhthusam a ni.

A la tawk lo
Bara hi Liverpool midfielder chhuak ta Georginio Wijnaldum nen sawizawm mek an ni bawk a, he thuziak i chhiar meuh chuan Barca player a ni tawh hial mai thei.

Kum 30 mi midfielder hian contract thar chungchangah Liverpool nen an inrem theih loh avangin Anfield chhuahsan a thlang a, khawthlang media-te chuan Barca-ah hian kum 2024 thleng contract a ziak dawn niin an sawi.

Barca hian Real Betis right back Emerson chu lakluh an tum mek bawk - Brazil international hi January 2019 khan Barca hian Betis nena inthawh ṭawmin an lo lei tawh a, euro maktaduai ruk ve ve an seng - Barca hian nipui transfer-ah hian an duh chuan an ta bil turin euro maktaduai kuain an lei chhuak thei dawn a ni.

Catalan club hi Memphis Depay nen sawizawm an ni mek bawk a, kum 27 mi forward hian season hman zawh takah khan French club ṭha Lyon tan inelna hrang hrangah match 40 khelin goal 22-a khung a, assist vawi 12 a nei bawk.

Real-ah Ancelotti?
Hetihlai hian Barca hmelma Real Madrid pawhin bul ṭan thar tumin Zinedine Zidane thlaktu atan veteran coach Carlo Ancelotti an lalut dawn niin an sawi a; Everton enkawltu Ancelotti hian Real hi lo enkawl tawhin Champions League-ah pawh a champion-pui tawh a ni,.