Brazil-ah Copa America - a chiang leh lo!

South American football-a ram leh ram inelna sang ber, Copa America khelhna tur a la chiang thei lo - South American Football Confederation (CONMEBOL) chuan Brazil-in inelna an thlen tur thu chu Thawhṭanni zan khan an puang a, mahse, Brazil sorkar lam chuan a la chian loh thu an sawi thung!

Copa America hi a tirah tak chuan Argentina leh Colombia-ten an inthlen ṭawm tur a ni a, mahse, Colombia ramah dodalna a nasat avangin Argentina chuan a ram mal anga inelna thlen mai a dil a, nghah a ni.

CONMEBOL thuneituten Argentina an duhsak laiin Covid-19 in zual lam a pan a, hetiang boruak kara inelna thlen chu Argentine mipuiten an zuam lo - duh lohna thawm a ri ring ring tial tial a, CONMEBOL chuan Argentina tan Copa America chu thlen chiah a ngai lo zui.

South American football thuneituten Thawhṭanni khan Argentina-in Copa America a thlen tur chu an hlihsak thu an puang a, zanah Brazil-in inelna a thlen tur thu an puang zui - thuthar berah erawh engmah a la chiang lo!

A buai leh ta
CONMEBOL chuan Thawhṭanni zan khan social media kaltlangin thuchhuah an siam a, "CONMEBOL chuan Brazil president Jair Bolsonaro leh a thawhpuite chungah lawmthu a sawi a, Brazilian Football Confederation-in kan tan kawng an lo hawng hian minti lawm em bawk - South America chu Brazil-ah arsi angin mawi takin a eng dawn a ni," an ti.

Mahse, CONMEBOL lamin thuchhuah an siam hnu lawkah General Luiz Eduardo Ramos, Brazil sorkara Chief of Staff dinhmun luahtu chuan engmah a la chian loh thu a sawi a, Ramos chuan, "Engmah tihfel a la ni lo a, hmabak hautak a la awm nual a ni," a ti.

He thuziak i chhiar meuh chuan Brazil sorkar lam hian inelna thleng turin thutlukna an siamfel tawh mai thei a, Brazil hian inelna hi a thleng dawn ta ngei a nih pawhin khawi stadium-ah nge inelna hi nghah a nih ang, tihah thuchiang sawi theih a la ni lo.

Chutihrual chuan Brazil hian World Cup 2014-a thlen hnuah kum 2019 khan Copa America a thleng leh a, inelna liantham pahnih tun hnaiah a thlen avangin stadium leh thil dangah chuan South American rama ngaihtuahawm lo ber pawl an nih a rinawm.

A buaithlak!
Argentina-in Copa America thlen a zuam loh chhan kha Covid-19 vei an pun hluai vang a ni a, hripui hlauh vanga tlanchhia CONMEBOL-in hripui vei tamna hmun tho Brazil a thlang leh lawi si hi chu thil mak tak a ni ve hrim hrim.

Brazil-ah hian Covid-19 vangin mi 460,000 dawnin an nunna an chan tawh a, USA tih loha Covid-19 vanga thi tamna ber an ni - mahse, South American football thuneitute chuan heti chung hian Brazil hi a himah an ngai tlat.

Hei mai a ni lo - Brazil a hripui vei tawh zat hi mi maktaduai 16 chuang an ni a, khawvela hripui vei tamna lamah pathumna an ni. Hetiang a nih avang hian Bolsonaro kaihhruai Brazil sorkar hian sawisel a tawk reng a, Inrinni pawh khan Covid-19 dona kawnga sorkar hnathawh duhkhawp lohna lantirin mipui an pungkhawm.

Reuters chhut dan aṭanga a lan danin tun hnai ni sarih chhungin Brazil a mipui 100,000 aṭangin mi 204 zel chu Covid-19 kai ang an ni a, Argentina-ah chuan mi 100,000 zela mi 484-in Covid-19 hri hi kai ang an ni thung.

President & Copa
Brazil-ah hian Covid-19 vangin Intensive Care Unit (ICU) khum zawng zawng a khat vek niin sawi a ni a, hri danna pekchhuah kawngah sorkar a muang em em bawk - hetiang boruak kara Copa America thlen lo sawi rik hi mipui tam tak tan chuan a ngeiawm ang.

Hetihrual hian Brazil president Jair Bolsonaro hi hripui dona kawnga a thawh dan avanga sawisel hlawh tak a ni a, amah ber hian Covid-19 hi a ngai thutak lo 'lui' rei viau bawk - hmanni lawka lockdown leh face mask ṭul ti loa thusawitu kha a ni a, invenna damdawi ringhleltu zinga langsar a ni bawk.

Hei vang hian Brazil chief of staff Ramos-a'n inelna an thlen dawn leh dawn lohah thil chiang a la awm lo angin sawi mah se inelna hi an thleng ngei dawn niin a lang a, Brazil president Bolsonaro hrechiangtute chuan tun ang boruaka Copa thlen hi Bolsonaro tih awm reng a nih thu an lo sawi ve bawk a ni.

South American mipui tam tak chuan inelna hi neih rih loh mai an duh hial a, mahse, Copa America 2019 aṭanga dollar maktaduai 118 laluttu CONMEBOL lam hian an sum chan tur thlir chungin inelna hun sawn leh hi an ui niin a lang.

Hlau suh u!

Brazilian mipui tam takin Copa America thlen an duh loh lai hian an ram vice president Hamilton Mourão chuan Copa America thlen chu thil hlauhawm a nih loh thu a sawi a, "Fans an awm dawn loh phei chuan Argentina-a Copa America khelh aiin a hlauhawm lo zawk daih a ni," a ti.

Hetihlai hian Brazil senator Renan Calheiros chuan Copa thlen tumna hi na takin a sawisel a, "Thihna inelna," tiin South America football-a ram leh ram inelna chu an thlen chuan an tan thihna tam tak thlentu a nih tur thu a sawi.

Hetihlai hian sports commentator lar Alexandre Lozetti chuan Copa America chhinchhiahna chu 'Little Covid' tih ni se a duh thu sawiin sorkar a tih el a, hri leng kara Copa thlen a duh lo hle.

Copa America hi ruahman ang chuan June 14 aṭanga khelh ṭan tur a ni a, tuna a lan dan chuan match hmasa ber hi Argentina leh Chile-in an khel dawn - mahse, inelna thlengtu thlak a nih dawn takah chuan fixture pawh hi a thar duan mai a ngai dawn niin a lang.