England squad-ah Greenwood a tel lo

England manager Gareth Southgate chuan nizan dar 9:30 khan Euro 2020 khel tur player 26 hming a puang a, he thu ziah lai hian tute nge tel tih hriat hman a ni lo.

Nimin tlai khan Manchester United forward Mason Greenwood chu inhliam vanga a inhnuhdawh thu a chiang hman a, kum 19 mi striker hi ṭhal na vangin Euro 2020-ah a inlan ve thei dawn lo.

Kum 19 mi Greenwood hi 2020-21 season-ah match 52 tehmeuh a khel a, goal 12 khungin Man United chu Premier League-ah pahnihna a nih pui bakah Europa League-ah final a thlenpui bawk.

Man United rawlthar hian nikum September thla khan England leh Iceland inkhelh ṭumin ram tan a inlan ṭan a, amaherawhchu Phil Foden nen Covid-19 dan bawhchhiat avangin koh zui a ni tawh lo.

Kumin March thla khan Greenwood hi Euro U21 aṭangin inhliam vangin a inhnukdawk a, England hi group stage-ah an tla. Euro 2020-ah Greenwood-a tan hming chherna remchang inher chhuak leh mah se inhliam vangin bawk a inlan thei dawn lo.

Southgate-a'n final squad puang mai loin player 33 a ko phawt a, Greenwood a inhnuhdawh takah chuan player paruk a paih a la ngai dawn. West Ham tana season ṭha tak hmangtu Jesse Lingard chu tel lo tura ngaih a ni a, player dang pangate nen nizan khan tihchian a ni ang.