Olympic khel lo tur Marin

Olympic badminton champion lai Caraolina Marin chu Tokyo Olympic-ah a inlan thei dawn lo. Spanish star hi a khup hliam vangin infiamna khawmpui lianah hian a inlan thei dawn lo a ni.

World champion vawi thum ni tawh hi a training laiin a inhliam a, a hliam hi a nat loh beisei ni mah se uluk taka endik a nih hnuah a chawlh rih a ngaih tur thu hi a chiang - a khup hliam vang bawkin tun hma pawhin a lo chawl reng tawh.

World number 1 hlui Marin chuan, "Ka khup veilam hliam chu uluk taka endik a ni a, tun kar tawpah hian zai a ngai dawn. Zai ka nih dawn avangin beiseina sang tak nena ka thlir Tokyo Olympic chu ka khel thei dawn lo.

"Keimah bakah team lam pawhin tun hnaiah harsatna hrang hrang kan tawk a, hun hrehawm tawn lai pawha min tlawp tlattu tam tak an awm hian min ti thlamuang ṭhin," tiin a sawi.

Rio Olympic-ah khan Marin hian PV Sindhu hnehin gold medal a la, hliam nei loin kuminah hian inlan thei se la chuan champion rinkai zinga mi a ni leh ang - mahse hreh tak chung Japan ram infiamna hi in aṭanga a en a ngai dawn.