Hnehna nen Federer a lo kir
A hming chu Roger Federer kha a ni e, tennis khel tur bika piang Federer chu French Open-ah a lo kir a, hnehna nen bul a ṭan. Thawhṭan zan khan a khingpui Denis Istomin chu 6-2, 6-4, 6-3 in a hneh.
Grand Slam vawi 20 champion tawh hian hnehna chang turin darkar khat leh minute 33 chauh hun a hmang, inelna lian hi chawlhkar hnih chhung khelh ṭhin a nih avangin tha khek a ngai a, match hmasa lama set hloh loh hi a pawimawh hle.
Roger a lawm
A vanglai pawhin Federer tan clay court hi hmun ṭha a ni ngai lo, a kum tam hnuah hliam leh thildang vangin a khel tam lo hle bawk. August thla a kum 40 tling mai tur hian 2020 Australian Open hnua a vawi khat nan Grand Slam a khel ve leh chiah.
Swiss star Federer chuan, "Ka khelh danah ka lawm hle. Thla hmasa lama Geneva Open ka khelh nena khaikhin chuan ka che ṭha viauin ka hria. Eng chena thui nge ṭha takin ka khelh theih dawn chu hre lo mah ila tunah chuan lawmna tur a ni," a ti.
Federer hian break point 13 a hmuh aṭangin panga a ti hlawhtling thei a, vawi 48 zet winners a vaw chhuak. A service aṭang bikin 80% zet point a hmu a, tun hma lama a service ṭha leh hlauhawm tak ang kha a pho chhuak leh ta.
Hmabak Cilic
Second round-ah Federer-a'n hna hautak a thawh nghal a ngai dawn, zaninah Marin Cilic nen an inhmachhawn zui leh ang. US Open champion hlui hian inkhel dangah Arthur Rinderknech chu 7-6 (8-6), 6-1, 6-2 in a lo hneh ve thung.
A hma hun zawhna chhangin Federer chuan, "Chak theih ka inbeisei, a niha takah chuan hard court-a inkhel ang maiah ka inngai. Mahse thil sawi lawk vak theih a ni lo, vawi khat atan chuan match khat ngaihtuah a tawk," a ti.
Federer-a tum ber chu Wimbledon champion nih leh a ni a, chumi ti hlawhtling thei tur chuan inkhelh tam a mamawh. French Open hi atan inbuatsaihna pakhat a ni a, a hlawhtling thei a nih chuan lungte pakhatin sava pahnih a perh tla tihna a ni ang.
Medvedev a chak
Daniil Medvedev pawhin a vawi khat nan French Open-ah chak ni hmel a hmu ve ta. Seeded pahnihna hian a khingpui Alexander Bublik chu darkar khat leh minute 54 chhungin 6-3, 6-3, 7-5 in a hneh.
Russian tlangval hian Paris khawpuiah hian chak ni hmel a hmu thei ngai lo, a zawnin season li zet chu hneh nei loin a tla. Tun ṭumah erawh a record duhawm lo tak hi a thaibo ta a, chak chhunzawm a duh ang.
Kum 25 mi Medvedev hian nikum December thla khan, "Kum 2050-ah chuan Roland Garros-a ka match hmasa berah ka chak ve mai thei," tiin twitter-ah a lo ziak tawh, tunah a chak ve ta a, "Bung thar ka kai," tiin a ziak leh bawk.
Inkhel dang
Seeded 13-na ni phak David Goffin chu a match hmasa berah a chak lo nghal. Goffion hi kum 19 mi Lorenzo Musetti lakah 6-0, 7-5, 7-6 (7-3) in a tlawm, kar hmasa lawka Lyon Open semifinal lut thei Musetti tan major tournament-a a chak vawi khatna a ni.
Kum 22 mi, seeded 15-na ni bawk Casper Ruud chuan Benoit Paire 5-7, 6-2, 6-1, 7-6 (7-4) in a hneh a, inkhel dangah service nei ṭha John Isner chuan amah ang bawka American tlangval Sam Querrey 7-6 (7-2), 6-3, 6-4 in a hneh.
Nizan khan champion lai Rafael Nadal a inlan a, result kan hre hman lo. Spanish tlangval hian major title 21-na leh French Open bika a nomawi 14-na chawi ngei a tum a, clay court inelna lian bikah chuan a thlen chin apiang hi record thar a ni zel.
