Westbrook leh Wizards an la tlawm lo

Russell Westbrook awmna Washington Wizards chu NBA playoff khelh laiah an la tlawm mai duh bik lo. Nimin zing game 4 inkhelah Westbrook-a triple-double hmangin Philadelphia 76ers chu 122-114 in an hneh.

Game hmasa pathumah 76ers an chak vek a, conference semifinal lut turin an dinhmun a ṭha hman hle - Wizards erawh thi leh dam kara leng an ni thung a, an tan chak loh a thiang tawh lo.

Inkhel boruak sang takah Westbrook chuan player pawimawh a nihzia lantirin - 19 point, 21 rebound leh 14 assist neiin a team a chakpui, basketball inelna sang berah hian playoff chinah ṭum 12 zet triple-double a nei ta.

Game 4 an lak avangin Washington Wizards hi an him tihna erawh a ni lo, tlang tur chuan khelh hmabak pathum an la neihah an chak vek a ngai dawn a, a hautak khawp ang. June 3, Ningani zingah game 5 an khel ang.

76ers hian an player pawimawh Joel Embiid chu hliam vangin an chan, minute 11 chauh a khel hman. Basket neih tuma a zuanna lamah a tla sual, club lam chuan a hliam dinhmun leh chawlh chen tur an la tarlang lo.

Nimin zing inkhel dangah Utah Jazz chuan Memphis Grizzlies chu 120-113 in an hneh a, playoff series-ah 3-1 in hma an hruai. Western Conference seeded pakhatna Jazz tan hian Donovan Mitchell (30 point) leh Rudy Gobert (17) ten an thawh hlawk hle.