Neuer-a'n Denmark a hmachhawn ang - Kopke

Germany goalkeeping coach Andreas Kopke chuan zanin dar 12:30-a Denmark an hmachhawn hunah Manuel Neuer-a'n inkhel bul a ṭan tur thu a sawi. Die Mannschaft hian June 7, Thawhlehni zan hian friendly match-ah Latvia an hmachhawn leh ang.

Joachim Low hote hi group F-ah champion lai Portugal, France leh Hungary nen an awmho a, knockout stage luh ringawt pawh a harsa dawn.

Kopke chuan, "Player an la kim lo nachungin Euro boruak a awm ṭan der tawh a, a lawmawm hle. Denmark hian Manuel Neuer a inlan dawn chiang a, Latvia nen erawh thutlukna kan la siam lo. Neuer thachhang dawltu tur hi training-na aṭangin kan thlan ang," tiin a sawi.

Barcelona keeper Marc-André ter Stegen chu inhliam vangin a tel thei lo a, keeper pahnih dang Kevin Trapp leh Bernd Leno te hi an intluk tawk avangin second keeper tur zawk hriatthiam a la har hle.

Germany hian Euro 2016 khan semifinal an thleng a, France hneh loin an tla. Joachim Low hote hian 2017 Confederation Cup-ah champion leh tho mah se beisei an pha lo chhunzawm a, FIFA World Cup-ah first round-a an tlak bakah Nations League-ah an mualpho.

World Cup 2018 zawhah Low-a'n Thomas Muller, Jerome Boateng leh Mats Hummels te a koh tawh loh tur thu a sawi a, Germany coach hian thutlukna sutin Muller leh Hummels te a ko let.

Kum 31 mi Muller chuan, "Player dang tih phurtu nih ka duh a, player dangte pawh minti phur turin ka duh bawk," tiin a sawi a, Bayern Munich forward hi player ṭha ber tih tur ni lo mah se team tana inpe ber tih theih tur khawpa theihtawp chhuah ṭhin a ni.