Konate leh Upamecano ten France chakpui thei lo

UEFA European Under 21 Championship quarter-final chu Thawhṭanni zan khan Hungary-ah khelh a ni a, football thiam ram Germany, Portugal, Netherlands leh Spain ten semifinal an lut.

Kum 21 hnuai lam inelnaah hian ram langsar England-in knockout stage an lut pha lo a, tun ṭuma chak lote pawh hi France, Italy, Croatia leh Denmark te an ni hlawm.

A ngaihnawm lai
Nipui transfer-a thawm nei lian pahnih Dayot Upamecano (£38) leh Ibrahima Konaté (£35m) te France tan an inlan. Player pahnih man belh khawm hi pound maktaduai 73 ze ni mah se senior team tan khel pha lo. Upamecano hian RB Leipzig aṭangin Bayern Munich a awm a, Konate hian Leipzig aṭangin Liverpool a zawm ve bawk. Chutihrualin France khingpui Netherlands-ah hian tlarhmaah Justin Kluivert an dah thei a, hming langsar tak vek an ni.

Les Bleus-in minute 23-naah Upamecano hmangin goal khung hmasa mah se Netherlands-in second half-ah Myron Boadu goal hnih hmangin an lehthal. Kum 20 mi Boadu hi AZ Alkmaar tan rinrawl a ni tawh a, season hman zawh takah pawh Eredivisie-ah goal 13 a khung.

Engtin zel?
Euro U21 hi June 3, Ninganiah khelh chhunzawm a ni dawn a, zan dar 12:30-ah Netherlands leh Germany an inhmachhawn ang. Germany hi inelna hnuhnung berah pahnihna an ni.

Hemi hma hian zan dar 9:30-ah champion lai Spain leh Portugal an inkhel dawn. La Roja hi Under 21 inelnaah vawi nga an champion tawh a, Italy nen an champion zat a in ang.