Piancham lawm nan Swiatek a chak

French Open hmeichhe singles champion lai Iga Swiatek chuan Thawhṭan ni khan kum 20 a tling a, Polish tleirawl hian a piancham lawm niah Kaja Juvan chu 6-0, 7-5 a hnehin second round a inhlangkai.

Swiatek hian season hmasa khan khawvel barakhaihin French Open nomawi a chawi a, tunah chuan dah hniam theih a ni tawh lo. Kuminah hian seeded pariatna pek niin, second round-ah Rebecca Peterson a hmachhawn leh ang.

Tennis court-ah Swiatek hi a piancham lawm nan pangpar an pe a, a lawmna belhchhahtu chu training an neih laiin a player ngaihsan ber Rafael Nadal nen an inbe thei a, a hlawkpui thu a sawi.

Swiatek hian an ina a chenna room-ah Nadal thlalak a tar ṭhin, Spanish star hming ziak chuanna T-Shirt a nei bawk. A tan chuan French Open vawi 13 champion tawh Nadal nena inbiak theih kha thil lawmawm bik a ni ngei ang.

Polish tleirawl Swiatek chuan, "Nadal chu a forehand leh topspin hi a ropui ka ti, a thu min hrilhte kha ka tan a ṭangkai ngei ang, phurna nasa tak min pe," tiin Nadal nen an inbiak chungchang a sawi.

Inkhel dangah champion tura rinkai Serena Williams chuan Irina-Camelia Begu lakah 7-6 (8-6), 6-2 in hnehna a chang hram a, major title 24-na lak a beiseina chu a chhawm nung hram.

Kum 39 mi Serena hian Margaret Court-i record (24 major titles) a nih rual hleithei lo, Grand Slam final a khelh hnuhnung pathumah a chak lo vek. Champion hnem ber ni tur hian nomawi pakhat chauh a mamawh tawh a ni.

American star hi kumin French Open bik atan a pheikhawp sirah 'Je ne m'arrêterai jamais' tih an ziahsak a, a awmzia chu 'ka tawp san lo ang' tihna a ni - Grand Slam champion hnem ber nih a tum hle.

French Open khelh laiah hian player langsar - Sofia Kenin, Bianca Andreescu, Garbine Muguruza, Kiki Bertens, Elise Merten leh Belinda Bencic te pawhin an khingpui ṭheuh hnehin second round an inhlangkai ve bawk.