Olympic khel tur Mary Kom

Indian boxer MC Mary Kom chu kumin nipui laia neih tur Tokyo Olympic khel turin a tling chiang ta, khawvel huap infiamna khawmpui lian berah hian a vawi hnih inlanna tur a ni ang.

Asian Qualifiers-ah Mary Kom hian 51kg huangah Thawhṭanni khan a khingpui Philippines mi Irish Magno chu 5-0 a hnehin semifinal a lut a, Yuan Chang nen final khel tur an zawng ang.

Seeded pahnihna Kom-i hmachhawn leh tur Chinese boxer hi Youth Olympic champion ni tawh a ni a, theihna nei sang a nih avangin a awlsam dawn lo - chutih rualin India nula pawh hi ram dang mi tana hmachhawn châkawm loh tak chu a ni ve tho.

World champion vawi nga ni tawh Mary Kom hi 2016 World Championships-ah khan second round-ah a chak lo a, Rio Olympic khel turin a tlin loh phah; tun ṭumah erawh chesual nawn loin a tling. Indian boxer dang Pooja Rani (75kg), Vikas Krishan (69kg), Amit Phangal (52kg), Satish Kumar (+91kg) leh Lovlina Borgohain (69kg) te pawh Tokyo Olympic hmachhawn tur hian an lo tling tawh bawk.