Gorkha lakah Lords an tlawm

Cricket Association of Mizoram (CAM) hnuaia inelna lian leh ngaihhlut, Mahuma Memorial 1st Division Tournament 2020 chu nimin khan league round khelh chhunzawm a ni a; Gorkha Cricket Club chuan champion lai Zarkawt Lords chu wicket sarih (7) in an hneh.

DSA Ground, Silchar-ah Zarkawt Lords hi ṭhum vawrah an vannei zawk a, vuak hmasak an thlang. Beisei angin run an siam hnem lo, over 39.1-ah run 141 chauh siamin an thi vek. Gorkha tan target sang a ni lo, over 31.3 lekah wicket thum hloh chungin an tum ram an thleng. Gorkha hi an match hmasa zawkah Kulikawn nen an intawn ṭumin ruah a sur a, match an khelh zawh theih loh avangin an inhnehtawk.

Lords erawh match hmasa berah Chanmarians lakah an tlawm tawh, match hnih an khelhah chak ni hmel an la hmuh loh avangin final beiseina a sang tawh lo. Vawiin hian a hmun ngaiah inkhel pakhat a awm leh dawn, chawhma dar 9:00-ah Durtlang leh Chanmarians te an inkhel ang.