Italy ramah infiamna zawng zawng titawp rih

Coronavirus vangin infiamna khawvel chuan buaina a tawk chho mek zel, Italy prime minister Giuseppe Conte chuan an ram chhunga infiamna chi hrang hrang chu April 3 hma chuan tihtawp lailawk vek a nih thu a puang.

Serie A pawh an khel thei dawn lo tihna a ni. Amaherawhchu, ram aiawha inkhel tur leh, ram danga team inlan tur ang chu a huam lo thung ang; sorkar thu chhuakin a tarlan dan chuan infiamna bakah mipui punkhawmna dang pawh khap rih a ni.

Italy Olympic Committee (CONI) chuan an rama infiamna tihtawp lailawk hi an duh dan a ni a, Serie A pawhin April 3 thleng entu nei loa inkhel turin thutlukna an siam tawh - tunah chuan player pawh an chawlh a ngai rih dawn ta zawk.

China ram aṭanga inṭan Covid-19 hi khawvel ram hrang hrangah a darh mek zel a, European ram zingah chuan Italy hi a tuar na ber an ni mek. Italy-ah hian hri kai 9,000 awm tawhin chung zingah chuan 450 chuang an thi.