England-in Arnold telna squad an puang

Football khawvela ram ngaihven hlawh pawl ni reng England chuan Thawhlehni zan khan Euro 2020 khel tur squad an puang ta a, an puan hma darkar thlenga khawthlang media-ten squad-a tel lo tur anga an tarlan Trent Alexander-Arnold chu player 26 zingah telh a ni.

England boss Gareth Southgate-a'n provisional squad-ah player 33 a ko hmasa a, a hausakna 'right back' ah player pakhat tal a thlauh thla leh tura ngaih a nih laiin Arnold bakah hian right back dang pathum Reece James, Kieran Trippier leh Kyle Walker-te chu squad-ah a telh tlang.

Southgate-a'n Manchetser United captain Harry Maguire leh Liverpool captain Jordan Henderson-te chu inhliam mah se squad-ah a telh a, player pahnih hi an dam chiang hman lo a nih ngat chuan England tan a pawi thui thei ang.

United forward Mason Greenwood chu hliam vangin a inhnukdawk a, West Ham midfielder Jesse Lingard, Sheffield United keeper Aaron Ramsdale, Brighton & Hove Albion centre back Ben White, Everton centre back Ben Godfrey, Southampton captain James Ward-Prowse leh Aston Villa forward Ollie Watkins-te chu squad aṭanga paih an ni bawk.

Southgate a huai lo?
England-in March thla khan World Cup qualifier khelin San Marino, Albania leh Poland an hmachhawn a, Southgate-a'n mak tak maiin Liverpool right back ṭhangduang Arnold chu squad-ah a telh lo.

Euro 2020 khelh a nih hmaa England-in competitive match an khelh hnuhnung ber a ni a, hei vang hian European football-a right back langsar ber pawl koh a ni lo hian titi a ti tam a, Euro-a kal lo tur ang hiala ngaih a ni.

Mahse, football fans leh expert tam takin Arnold koh a ni lo hi an sawisel a, season zawna Champions League leh Premier League nomawi chawitu defender hian league tawp lamah a theihna tak tak pholangin Premier League right back hmuhnawm pawl a ni zui.

Southgate-a'n provisional squad-ah Arnold-a telh zui a, tunah chuan Euro-ah Three Lions aiawha jersey ha tur zingah a tel ta - zawhna awm ta erawh thutlukna siam kawngah Southgate hi a huaisen tawk lo em ni, tih chu a ni.

Right back pali
Southgate-a'n provisional squad a puan khan, "Mi chuanin right back pali an hmu a, kei chuan footballer ṭha tak pali ka hmu," tiin a sawi a, a right back neihte position hrang hranga an khelh theih dan thlengin a sawi - khatihlai khan right back pali hruai turin thutlukna a siam daih tawh tih a lang.

England right back-a khel tura Arnold-a elpuite hian season hman zawh takah khan nomawi an chawi vek. James-a'n Chelsea tan Champions League nomawi a chawi a, Atletico Madrid tan Trippier-a'n La Liga nomawi a chawi a, Walker chu Premier League-a City champion puitu a ni bawk.

Arnold hi tlarhnung ven lamah ṭha tawk lo nia sawi a ni ṭhin a, defender tan thu hriat nuam a ni lo - mahse, season hman zawh tak aṭanga tehin a elpui player pathum zingah tackle (56) leh clearance (43) ngah lama a tluk loh awmchhun chu Trippier (61 & 47) chiah a ni.

Goal nawr kawngah chuan Arnold hi 'world class' a ni bawk - season hman zawh takah khan league-ah assist vawi sarih a nei a, vawi 199 a cross a, vawi 77 chance a siam. Set piece pet a thiam a, right back aṭanga team tana danglamna thlen thei a ni - heng zawng zawng ngaihtuahin in aṭanga Euro en tura hnutchhiah hi Southgate tan a harsa ve bawk ang tih a chiang a, a right back pali chhawr dan tur hi hriat a châkawm ta hle.

Inhliam & a behbawm
Southgate-a'n hliam nei mah se Henderson leh Maguire koh a thlang a, an position anga khel, season duhawm tak hmangtu Ward-Prowse, White leh Godfrey-te tan chuan a 'na' ang.

Kum 26 mi Ward-Prowse koh a ni lo hi a mak lehzual a, Southampton captain hian season hman zawh takah khan league match 38 khelin goal riat a khung a, assist vawi sarih a nei bawk.

Southgate chuan player inhliam a koh chhan sawifiahin, "Maguire leh Hendo hian kan zinga tel tak tak tur chuan hnathawh tur chu an la nei ngei a, mahse, he inelnaah hian an inlan theih kan beisei vanga ko kan ni. Kan zinga anni pahnih an tel hi team tan a ṭha hrim hrim bawk.

"Henderson hi hruaitu ṭha tak a ni a, a bik takin squad-a player naupang zual tan a ṭangkai ṭhin hle. Player 26 kan thlan theih bawk avangin Hendo leh Maguire-te squad-a telh tur hian inngaihtuah buai a ngai lo," a ti.

Naupang rual
England player-te kum chawhrual hi kum 25 leh thla thum a ni a, Euro-ah squad nei naupang ber pawl ni chungin inelna an hmachhawn dawn. Kum 17 mi Jude Bellingham chu English player naupang ber a ni a, Borussia Dortmund-a a khelh dan en tan chuan squad-a a tel hi a mak lo.

Southgate chuan, "Player ṭha bik a ni a, kum 17 mi lek ni chungin senior player-te nena inel nuam ti a, a thiamna piahlama a tuihalna leh puitlinna hian a tihlu hle bawk. Tawnhriat satliah atana hruai kan ni lo a, England player pawimawh a la ni dawn a ni," a ti.

Three Lions hian kum 19 mi Bukayo Saka, Chelsea player thiam bik Mason Mount (kum 22), City tana hming chher mek Phil Foden (21) leh European club liante chil tiputtu Jadon Sancho (21) an nei bawk a, anni ringawt pawh hi thlamuanpui tham an ni.

West Ham midfielder Declan Rice pawh hi kum 22 lekah Premier League-a holding midfielder hmuhnawm pawl a ni der tawh a, kum 25 mi Aston Villa captain Jack Grealish hian goal a siamsak theih piahlamah a khung dan a thiam tel a, inkhel khaiding thei khawpa player thiam bik a ni bawk.

Semifinal aia sang
Southgate-a kaihhruaina hnuaiah England-in World Cup 2018-ah semifinal an lut a, September 2016-a ruat coach kaihhruaina hnuaiah hian kum 2019 khan Nations League semifinal an khel bawk.

Middlesbrough coach hlui chuan, "Semifinal aia hniama kan tawp chuan kan hlawhchham tihna a ni ang. Inelna kan hmachhawn hnuhnung pahnihah a zawnin semifinal kan lut a, a aia sang zawk thlen kan tum tawh dawn a ni," a ti a, semifinal maia lungawi a tum lo hle.

Three Lions hian Hammers tan league match 16-a khelha goal kua khunga, assist vawi nga neitu Jesse Lingard pawh mamawh loin an inhria a, an ṭha tawk tih a lang - chutihrual chuan an match hmasa berah World Cup finalist Croatia chu June 13 zanah an hmachhawn dawn a, a harsa nghal dawn.

England hi group D-ah an awm a, Croatia bakah Czech Republic leh Scotland an awmpui bawk a, chetsual theihna vek an ni - nizan khan Euro inbuatsaih nan friendly match-ah Austria an hmachhawn a, he thu buatsaih a nih lai hian result kan hre hman lo. Romania chu Pathianni zan dar 9:30-ah friendly match an khelhpui leh ang.

England Squad
Goalkeepers: Dean Henderson (Man Utd), Sam Johnstone (West Brom), Jordan Pickford (Everton)
Defenders: John Stones (Man City), Luke Shaw (Man Utd), Harry Maguire (Man Utd), Trent Alexander-Arnold (Liverpool), Kyle Walker (Man City), Tyrone Mings (Aston Villa), Reece James (Chelsea), Conor Coady (Wolves), Ben Chilwell (Chelsea), Kieran Trippier (Atletico Madrid)
Midfielders: Mason Mount (Chelsea), Declan Rice (West Ham), Jordan Henderson (Liverpool), Jude Bellingham (Borussia Dortmund), Kalvin Phillips (Leeds)
Forwards: Harry Kane (Tottenham), Marcus Rashford (Man Utd), Raheem Sterling (Man City), Dominic Calvert-Lewin (Everton), Phil Foden (Man City), Jack Grealish (Aston Villa), Jadon Sancho (Borussia Dortmund), Bukayo Saka (Arsenal)