Nadal leh Novak tan harsatna awm lo

Rafael Nadal-a'n French Open nomawi a chawi hnuhnung ber aṭangin thla riat a liam leh tawh a, a vawi 13 nana a champion ṭum kha Paris khawpuia favang leh thlasik boruak inbuan lai vel bawr a ni.

Tun ṭumah erawh nipui laiin Roland Garros an khel thei leh ta, a boruak danglam mah se Nadal khelh dan erawh a danglam phah lem lo. Spanish tlangval leh Novak Djokovic ten harsatna tawk loin an match hmasa berah hnehna an chang.

Mi bik Nadal
World number 3 a nih vangin seeded pathumna pek a ni a, duhsak bik hlawh loin player dangte nen ang khata en a ni. Nadal tan buaina tur a awm chuang lo - darkar hnih leh minute 23 chhungin Alexei Popyrin chu 6-3, 6-2, 7-6 (7-3) in a hneh.

Kum 21 mi Popyrin-a'n a service ṭha leh ball vuak na tak hmangin Nadal a bei let a, set thumna bikah phei chuan a dinhmun a siamṭha hman hle. Mahse, set point a hmuh pahnih a chhawr ṭangkai thei lo a, tie break khelh niin a hloh zui bawk.

Grand Slam vawi 20 champion tawh Nadal chuan, "Nikum khan boruak nuam tak hnuaiah hlawhtlinna ka chang, a nuam hle. Kuminah erawh boruak lum tak hnuaiah kan inkhel leh ta, mahse hei hi tun hma lama kalphung pangngai zawk chu a ni.

"Boruak lum leh Roland Garros hi a inzawm tlat tawh a, player dangte pawhin khaw lum hnuaia inkhelh hi nuam an tih ka beisei," a ti. Nadal hi a champion leh a nih chuan major title lak hnem lamah Roger Federer (20 titles) a khum ang.

Novak a chak
Novak Djokovic pawhin second round lut turin buaina a nei lo, world number 1 hian American player Tennys Sandgren chu 6-2, 6-4, 6-2 in a hneh - hnehna chang turin darkar khat leh minute 58 bak a mamawh lo.

Season hmasa khan final-ah Djokovic hian Nadal a ngam lo, kuminah player pahnih hi an kaltluang ve ve a nih chuan semifinal-ah an inhmachhawn thei dawn, an kalkawngah hian Federer a tlazep thei dawn bawk.

Court Philippe Chatrier-ah Djokovic a mikhual lo a, kar hmasa lawka Belgrade Open title latu hian winners vawi 33 a vaw chhuak a, a tihsual vanga a khingpuiin point a hmuh erawh 21 zet a nih avangin insiamṭhatna lai tur a nei.

Serbian star Djokovic chuan, "A vawi khat nan zanah French Open ka khel, a boruak a danglam hle. A tir lamah chuan ngaihtuahna pawh a kalding hman hle. Mahse set hmasa ber aṭangin a nih dan tur angin ka khel thei," tiin a sawi.

Rublev a tla
Tennis khelhna hmun a inang lo - hard, grass leh clay hi ball kal dan a danglam vek avangin player ṭhenkhat tan chuan insiamrem a harsa ṭhin. Seeded pasarihna Andrey Rublev chu thleng sang tur zinga ngaih ni mah se a match hmasa berah a chak lo.

Russian tlangval hi world number 42 Jan-Lennard Struff nen darkar thum leh minute 46 an inkhelh hnuah 6-3, 7-6 (6), 4-6, 3-6, 6-4 in a chak lo zawkah a ṭang, major tournament a khelh hnuhnung pathumah quarterfinal thleng phak mah se tun ṭumah chuan thawnthu a danglam.

Rublev a tlak takah chuan Nadal tan quarterfinal thleng chuan player langsar tak hmachhawn tur an awm dawn lo, chutih rualin Rublev hnehtu Struff hi a service a ṭha hle, vawi 25 ngawt aces a vaw chhuak thei tih hriat a ṭha.

World number 7 Rublev chuan, "Inbuatsaihna ka nei ṭha a, harsatna pawh ka nei lo. Mahse, set point hmuh tawh hnuah mahni service aṭanga point kan hmu thei lo a nih chuan a harsa tawh ṭhin," tiin a vanduai thu a sawi.

Inkhel dang
Thawhlehni zan inkhel dangah Gael Monfils chu dinhmun chhe zawkah ding hman mah se a chak. Tualchhung tlangval hian Albert Ramos-Vinolas chu 1-6, 7-6 (8-6), 6-4, 6-4 in a hneh hram, a hmuna inkhel entuten an lawmpui hle.

Kum 34 mi Monfils hi tun hnaiah a khel chhe thei lo, hrileng vanga inkharkhip hnu lamah tun ṭum hi hnehna a chan lehna hmasa ber a ni. Anmahni ramah ngei chak ni hmel a hmu ve leh ta a, hnehna a chan hnuah fans lamah kalin lawmthu a sawi hial.

Thlengsang tura rinkai zinga mi Diego Schwartzman chuan Lu Yen-Hsun lakah 6-2, 6-2, 6-3 in hnehna a chang a, inkhel dangah seeded pakuana Matteo Berrettini pawhin Taro Daniel chu 6-0, 6-4, 4-6, 6-4 in a hneh ve bawk.

Russian player ten beisei an phak lohna hmunah Aslan Karatsev erawh a chak. Russian tlangval hian world number 163 Jenson Brooksby chu 6-3, 6-4, 6-4 in a hneh a, Australian Open-ah quarterfinal a then theih avangin tun ṭumah pawh hian beisei a nei sang.