Everton chhuahsanin Real Madrid-ah Ancelotti a kir

Real Madrid-in Zinedine Zidane thlakna tur atan mi thar ṭha an hre lo - Everton aṭangin an manager hlui Carlo Ancelotti an la let. Kum 61 mi Italian manager hian kum 2013 leh 2015 inkar khan Los Blancos hi a lo enkawl tawh a ni.

Ancelotti hian Real Madrid enkawl turin kum thum atan contact a ziak a, Everton-in Italian manager thlakna tur an zawn ṭan nghal thu an puang ve bawk.

Zidane kha
Kum 48 mi Zinedine Zidane kha football tactician ṭha anga sawi ni lo mah se nomawi chawi dan thuruk a hre tlat. French manager hian kum 2014 leh 2016 inkar khan Real Madrid Castilla a enkawl a, Los Blancos-in January 4, 2016-a Rafael Benitez an ban khan Zidane hian a thlak.

Zidane hian kum hnih leh a chanve chhung lekin UCL nomawi pathum bakah La Liga nomawi a chawipui nghal. Amaherawhchu Zidane hian team-ah thlak ngai a awm thu sawiin May 2018 khan Real Madrid manager aṭanga a chawlh tur thu a puang.

Real hian World Cup hmachhawn mai tur Spain coach Julen Lopetegui chu team enkawl turin an ruat a, Lopetegui hian a hna chan phah hial mah se a chet ṭhat loh avangin Castilla coach Santiago Solari chu team enkawl turin an ruat lailawk.

Amaherawhchu Solari lakah an duh khawp hmu loin March 11, 2019-ah Zidane an la let leh a, French manager ho hian 2019-20 khan La Liga nomawi an chawi. Chutihrualin Real-in tlakhniam lam an pan tih hai rual a ni lo a, season hman zawh takah Chelsea lakah mualphoin league-ah an hmelma Atletico nomawi chawi lai an thlir bawk.

Season tawpah Florentino Perez-a'n Zidane-a thutlukna a ngaichang a, French manager hian ban a thlang ta zawk. Zidane chuan, "Club-in ka chungah rinna an nghah tawh loh avangin ka chhuak a, tun leh nakin atana team dinna kawngah min ring tawh lo a ni. Football hi ka hrethiam a, Real Madrid-te ang club lian aṭanga beiseina pawh ka hrethiam a, beisei ang result a awm loh chuan chhuak mai tur kan ni," tiin club-in an rin tawh loh avanga chhuak a nih thu a sawi.

A thlakna tur
Real Madrid hian Zidane-a thlakna tur hian Massimiliano Allegri an be fela ngaih a ni a, amaherawhchu French manager ban fel hmain Juventus-in an manager hlui Allegri an lakkir thu an puang. Inter Milan leh manager Antonio Conte an inṭhen a, Los Blancos leh Italian manager hi an sawizawm.

Amaherawhchu Conte hian team enkawlah thuneihna chelh a duh a, a player duh zawng lak kawngah club hotute lakah phut a nei sang. Covid-19 vanga sum dinhmun ṭha lo Real Madrid tan pa luhluh Conte kaihhruai a harsa dawn a, club president Perez-a'n thil thlen theih dan a hmu tlang vekah ngaih a ni bawk.

Espanyol leh Tottenham manager hlui Mauricio Pochettino hming pawh sawi rik a ni a, Madrid lamah phei chuan club legend Raul hming thlengin an sawi ri. Thuthang a tam a, Madrid chhungkaw boruak hrechiangtute sawi danin, "Real Madrid hian coach duh zawng bik pawh an nei lo. Perez hian coach hi a dah pawimawh ber lo a, a pahnihna chauhah a dah. Duh dan bik an nei lo a, an lak theih tur an la ang," tiin an sawi.

Real Madrid-in hming langsar leh tawnhriat nei ṭha erawh an duh niin a lang a, tawpa an mit fukna chu Carlo Ancelotti a ni. Real Madrid hian kum 2014 khan a vawi 10 nan Champions League-ah an champion a, heta team enkawltu chu Ancelotti hi a ni. 2014-15 season-ah Real Madrid hian FIFA Club World chawi mah se inelna ngaihhlut zawk La Liga leh Champions League-a an champion loh avangin Italian manager hi an ban a, club thuneitute thutluknaah player-te an lawm lo.

Toffees tan channa
Everton tan football khawvela manager langsar ber zinga mi Carlo Ancelotti an kawl hi vanneihna a ni a, chutihrualin an chelh thei lo hi hnual rawihna tham a tling. Ancelotti ho hian kum 1999 hnuah a vawi khat nan Anfield-ah Liverpool an hneh a, chutihrualin season puma enkawl hmasak berah 10-na chauh an ni pha.

Result thlir chuan Ancelotti thlakna tur hi an awm mai dawn. Wolves manager chhuak ta Nuno Espirito Santo, West Ham manager David Moyes bakah Rangers champion puitu Steven Gerrard thlengin an sawi ri nghal a, mahse heng manager ho hi Ancelotti nen huang khatah an awm lo.

Toffees erawhin an nihna an pawm a ngai a, club neitu Farhad Moshiri sum thehchhuah dan aṭanga tehin Europe club lian elpha tur an ni lo. Real Madrid leh Everton a inlen hleih em a, Ancelotti-a'n Real Madrid a pan hi thutlukna awm tak a ni reng a ni.

Chona thar
Real Madrid hi tla chhe ta viau angin a lang a, amaherawhchu Zidane-a hnuaia an record hi a chhe lo. Season hman zawh takah khan Champions League-ah semifinal an lut a, La Liga-ah pahnihna an ni. Heti chunga French manager-in Los Blancos a chhuahsan a nih chuan Ancelotti tan pawh chona thar hi a huphurhawm hle.

Ancelotti-a'n hna hmasaah Real Madrid-ah a player duh ang an awm kim em tih a ngaihtuah hmasak a ṭul dawn. Euro 2020 khel tur Spain squad-ah Real player pakhatmah an awm lo a, team enkawl tur tan chuan ngaimawh tham a tling. Chutihrualin tarlan tawh angin Covid-19 vangin tun hma angin Real Madrid-in player lei nan sum an theh chhuak tam thei lo ang.