A rei dawn lo - Mayweather

American boxer ropui Floyd Mayweather chuan YouTuber Logan Paul nena an inhnek tur chu a rei loh tur thu a sawi a, kum 44 mi boxer chuan, "Inlan kha ka tih tur chu a ni mai a, round khatna leka zawh ka duh chuan a zo mai ang," a ti.

Boxer pahnih inhnekna tur hi a nihna takah erawh exhibition match tih a ni a, round riat khelh tura ruahman a ni - round khat hi minute thum zel a ni ang a, he inhneka result hi fighter pahnih professional record-ah tarlan a ni lo ang.

YouTube hmanga intilar Paul hian kum 2019 khan a vawi khat nan professional boxing a khel ve chauh a, amah ang thoa YouTuber lar KSI lakah split decision hmangin a tlawm a ni - hei lo hi professional fight dang hmachhawn a la nei lo a, Mayweather-a lakah chuan nau tak a ni.

Hetihlai hian May-weather erawh boxing khawvela boxer ropui ber ang hialin tam takin an ngai a, weight division paliah champion tawhin vawi 50 fight-a hmachhawnah tlawm a nei lo.

Fighter pahnih inhnek tur hi boxing ngainatu tam tak chuan boxing hmuhsitnaah an ngai a, ṭhenkhatin boxing ngaina ngai lo tam takin boxing an ngainatna turah an ngai thung - inhnialna a nasa hle.

Hetiang a nih avang hian tam takin Mayweather hian eng vanga he fight hi hmachhawn tur nge a nih, tih zawhna an nei a, 'Money' Mayweather inti ngat boxer hian fight-a hmachhawn duh chhan ber chu sum a ni tih a chiang.

Mayweather hian kum 2017-a UFC champion Conor McGregor a hmachhawn khan dollar maktaduai 275 a lalut nia sawi a ni a, kum 2018 khan Japanese kickboxer Tenshin Nasukawa chu exhibition fight-ah minute hnih chhung leka hnehin dollar maktaduai kua a lalut bawk.

Pathiannia Paul nen an inhnek turah pawh Mayweather hian dollar maktaduai 100 vel thleng chu a hlawh thei dawn nia sawi a ni a, American boxer hian sum tam tak hlawhna tur a nih chuan tih hreh a nei lo.

Pay per view (PPV) hmanga en tur inhnekah hian Mayweather hi kum 72 aia a rih a rem lo a, Logan Paul hi kg 86 hnuai lam a nih ngei ngei a ngai thung - Logan hi 6ft 2in a sang a ni a, Mayweather hi 5ft 8in a sang a ni thung.

Miami-a fight nei tur fighter pahnih hi an rih zawng leh san zawng, pumrua thlengin inthlau viau mah se khaikhin chi an ni lo a, Mayweather tan chuan nuamsa taka sum tam tak hlawhchhuahna tur a ni ber.

Logan Paul-a unaupa Jake Paul pawh hi YouTuber lar tho a ni a, kum 24 mi pawh hian vawi thum fight lo hmachhawn ve tawhin a chak vek - April thla khan MMA fighter chawl tawh Ben Askren chu round khatna lekah technical knockout hmangin a hneh.