Cancer ngamtu Navarro a inkhel leh ta

Thawk lamah harsatna a neih avangin Covid-19 a kai emaw a inti hman a, mahse cancer a lo ni reng si. Natna khirhkhan tak cancer a kai tih a hriat aṭanga thla kua a liam hnuah Carla Suarez Navarro chu French Open-ah a inlan.

Spanish nula hi Thawhlehni zan khan Sloane Stephens lakah 3-6, 7-6 (7-4), 6-4 in a chak lo, chak lo mah se a chanchin hi media lam chaw tui a ni chhunzawm. A natna hi thla ruk chhung enkawl a ni a, a nihna takah chuan nikum tir lama a inkhelh kha tunah hian a chhunzawm leh chiah.

World number 6 hlui Suarez Navarro chuan, "Roland Garros hi ka tournament ngainat berte zinga mi a ni a, he hmuna ka lo kir leh thei hi ka lawm takzet zet a ni. Hun harsa ka hmachhawn lai pawh khan inkhelh leh theih ngei hi ka thil tum a ni," a ti.

Cancer a vei tih a hriat hma khan Suarez Navarro hian kum 2020 bak chu inkhelh a tum tawh lo, mahse natna khum aṭanga tennis chawlhsan thu puan a duh lo - tunah chuan Tokyo Olympic khelh theih ngei a beisei leh ta zawk.

Hnehna changtu Stephens chuan, "Carla, Paris khawpuia kan inkhel thei hi ka lawm, ka lawmna ti zualtu chu hrisel taka ka hmu thei che kha a ni. Midangte cho phurtu ropui tak i ni, tennis court-ah kan lo lawm a che," tiin a khingpui chungchang a sawi.

Inkhel dangah world number 1 Ashleigh Barty chuan fiahna a paltlang. Australian star hian Bernarda Pera chu 6-4, 3-6, 6-2 in a hneh a, inkhelh laklawh lai hian a malpui vei lam hliam vanga enkawl lailawk a ngai hial.

Venus Williams erawh seeded 32-na Ekaterina Alexandrova lakah 6-3, 6-1 in a chak lo. Amercian player hian a vanglaiin Grand Slam nomawi pasarih zet chawi mah se, tun hnaiah erawh a tlahniam ve ta hle.

French Open a khelh hnuhnung palinah Venus hian hneh a nei lo, kum 40 mi a nih tawh avangin clay court inelna lian atan chuan a hun a liam tawh tih a sawi ngam - tennis chawlhsan erawh a la tum lo niin a lang.

Venus a chak loh lai hian American tleirawl Coco Gauff erawh a chak. Seeded 24-na Gauff hian Aleksandra Krunic chu 7-6 (13-11), 6-4 in a hneh, set hnih chauh khel mah se inkhelh hun chhung hi darkar hnih leh minute sarih zet a tling.

French Open aṭang hian world number 2 Naomi Osaka a inhnukdawk tawh, tunah Petra Kvitova a inhnukdawk ve leh ta. Grand Slam vawi hnih champion tawh Kvitova inlan chhunzawn theih loh chhan erawh a ke rek hliam vang a ni.