Theihtawp kan chhuah dawn - Lianzuala

Indian football team chuan zanin dar 10:30 hian World Cup qualifier-ah Qatar an hmachhawn dawn a, Blue Tigers squad-a awm Lallianzuala Chhangte chuan theihtawp chhuaha an khelh tur thu Vanglaini a hrilh.

Lunglei tlangval Lianzuala chuan, "Hri leng avangin duh angin inbuatsaihna neih theih a ni lo a, ei leh in lam thuah pawh a tirah kha chuan duhthusam a ni lo. Mahse, tunah chuan tlemin a zia ve leh deuh tawh a, training pawh kan neih theih chhunah theihtawp kan chhuah zel. A nihna takah chuan hei aia rei deuh hi training theih pawh a châkawm a, kan theihtawp erawh kan chhuah dawn a ni," a ti.

India coach Igor Stimac chu Qatar-in an lo thlen danah lungawi loin, ei leh in pawh room-ah hlir pek an nih avangin an tan thil a harsat thu a lo sawi tawh a, "Vawi thum min test a, kan negative vek chungin inhmuhkhawm pawh a theih loh a ni," a ti a, training bakah video call bakin team an inhmukhawm hleithei lo a ni.

Vaivakawn rawlthar Lalengmawia (Apuia) chu India squad-ah a awm ve bawk a, NorthEast United midfielder chuan, "Inbuatsaihna pangngai tak kan nei a, team ṭha tak an nih avangin a harsa ang," tiin Vanglaini a hrilh.

Zanin inkhel tur hi India tan 'home' game ni mah se Covid-19 avangin Asian Football Confederation chuan group E-a khelh hmabak la awm chu Qatar-ah hian a nghat vek a, India hian Qatar an hmachhawn zawhah Bangladesh (June 7) leh Afghanistan (June 15) an hmachhawn leh ang.

India hian World Cup qualifier-a match nga an khelh tawh aṭangin point thum an hmu a, World Cup 2022 khel turin an tling thei tawh lo. Chutihrual chuan group-a a ti ṭha pathumnain Asian Cup 2023 qualifier chu third round aṭangin an khel ṭan thei dawn a, India tan hei hi khelh chhan a la tling.

Blue Tigers inkhel hi Star Sports 2 & 3-ah a en theih dawn a, online-a en duh tan Hotstar leh JioTV lamah a en theih bawk ang.