Sum hmang tam turin Man City an inpeih

Manchester City chairman Khaldoon al-Mubarak chuan nipui bazarah sum hmang tam turin an inpeih thu a sawi. Champions League final-ah Man City hian Chelsea an hneh lo a, season tharah team ṭha zawk din an tum.

Sum hmang tam
September 1, 2008 khan Abu Dhabi United Group Investment and Development Limited (ADUG) chuan Manchester City hi UK Sports Investments Limited (UKSIL) hnen aṭangin a lei a, Premier League club hmel hmang a danglam nghal.

Man City hian Real Madrid aṭangin pound maktaduai 32.5-in Robinho an lalut a, thawm an nei lian nghal. Season khatnaa an lak zingah Vincent Kompany leh Pablo Zabaleta te pawh an tel. Season tinin Man City hian pound maktaduai 100 bawr vel an hmang chho reng tihin a sawi theih.

Pep-a a bang lo
Pep Guardiola hian kum 2016 khan Manuel Pellegrini a thlak a, Spanish manager duh zawng hi club neitute hian an lei sak zel ni berin a lang.

Pep-a hnuaiah hian Man City-in pound maktaduai 750 ($1bn) vel zet player lak nan an hmang. Ilkay Gundogan chu Pep-a player lak hmasak ber a ni a, pound maktaduai 20 man niin Nolito (£13.8m), Leroy Sane (£37m), John Stones (£47.5m) leh Claudio Bravo (£15.4m) te pawh telin nipui bazar hmasa berah pound maktaduai100 chuang a hmang nghal.

Kum 2017-ah phei chuan January thlaah Gabriel Jesus (£27) a lalut a, nipui bazarah Bernardo Silva (£43m), Ederson (£34m), Kyle Walker (£45m), Danilo (£26.5m), Benjamin Mendy (£49.3) leh Aymeric Laporte (£57m) te an lei ṭhawt.

Kum 2018-ah Man City thawm a reh deuh a, chutichung chuan pound maktaduai 60 zetin Riyad Mahrez an lalut tho. Kum 2019-ah player langsar pahnih Rodri (£62.8m) leh Joao Cancelo (£60m) te an lalut.

Nikum khan Ruben Dias (£62.1m), Nathan Aké (£40m) leh Ferran Torres (£20.7m) te an la leh a, hetichung hian an duh ber Champions League nomawi an chawi thei lo. Man City-in sum an hmang hnem tih hi phat rual a ni lo.

Aguero thlakna
Man City chairman Khaldoon al-Mubarak-a'n manager Pep-a chungah rinna a la nghat a, Spanish manager-in player ṭha chhawr tur a neih theih nan sum ṭhahnem tak a chhawp chhuak dawn.

Khaldoon chuan, "Premier League nomawi chawi a, chawl hahdam a, lungawi mai tur kan ni lo. Sergio Aguero hmunruak hi hnawhkhah a har dawn a, a thlakna tur ṭha tak kan lak theih ka ring," tiin a sawi. Tottenham striker Harry Kane leh Borussia Dortmund striker Erling Haaland te a mit thla theih nghal.

Man City chairman Khaldoon chuan sawi chhunzawmin, "Player ṭhahnem tak lak lam ka sawi lo a, kan duh tak player lak a ni. Kan sum dinhmun a ṭha a, awmze nei takin kan hman ang," tiin a sawi. Premier League champion hian player ṭha an lakluh theih nan an player ṭhenkhat an chhuahtir a rinawm bawk.

Pep Guardiola chungchang sawiin Khaldoon chuan, "Ka ring tawk em em a, kan inkar boruak a ṭha bawk. Pep-a chelh hi kan duh ber a ni a, kan club-a hun rei tak a cham theih nan theihtawp kan chhuah ang," tiin Champions Legue nomawi la chawi pui lo mah se a chungah rinna an la hloh loh thu a sawi.