Chelsea leh Leicester-ten pawisa an chawi

English football-a thuneitu sang ber Football Association chuan Chelsea leh Leicester City chu khelmual chhunga an chet dan mawi lo avangin pawisa a chawitir a, club pahnih hian £22,500 (Rs. 23,24,432) ve ve an chawi a ni.

May 18 zan khan team pahnih hi Premier League match pawimawhah an inhmachhawn a, inkhel hi Foxes-in FA Cup final-a 1-0 a Chelsea an hneh hnua thleng a ni a, Blues-in 2-1 a hnehna an channa inkhel hi top four inchuhna a nih tel bawk avangin boruak a sang hle - rin ang ngeiin buaina a chhuak.

Stamford Bridge-a buaina chhuahna chhan hi Leicester full back Ricardo Pereira-a’n Ben Chilwell laka tackle a neih vang a ni a, Antonio Rudiger chuan Pereira hi a pan ding nghal - team pahnih aṭangin player bakah coaching staff-te buainaah hian an inrawlh zui. Foxes bench-a ṭhu Daniel Armartey chu yellow card pek a ni a, Chilwell laka foul Pereira chu yellow card pek a ni bawk.

FA chuan thuchhuah siamin, “Chelsea leh Leicester City-te chuan FA Rule E20.1 dan an bawhchhia tih an pawm hnuah £22,500 ve ve chawi turin hrem an ni.Club pahnihte hian minute 93 chung inkhelah khan an player leh staff-te an thunun tawk lo tih an pawm a ni,” an ti.

Blues hian May 2016 khan Tottenham Hotspur nen hetiang hian buaina an lo nei tawh a, hetihlai hian £375,000 chawitir an nih bakah hetiang buaina an tawh leh chuan point paihsak thlenga hrem an nih theih thu hrilh a ni.

Hetiang boruak karah hian Blues hi an point paihsak an nih tur thu thlengin khawthlang media-te chuan an tarlang hman a, mahse, pawisa chawi bak hremna an tawk dawn ta lo.