Barca-in Emerson Royal an la

Barcelona-in ni thum chhung lekin player pathum an la. Manchester City aṭanga Sergio Aguero leh Eric García te an lakluh hnuah nimin khan Real Betis aṭangin right back Emerson Royal an lalut.

Kum 22 mi Emerson hi Barca leh Betis te hian neitu nihna an inṭawm a, Catalan club hian kum 2019-a club pahnih inremnaa an ziah angin euro maktaduai 9-in an la nghet.

Right back-a khel ṭhin Emerson hian kum 2024 thleng contract a ziak a, Copa America-a Brazil squad-a tel pha a nih avangin team ti chak thei tur player a ni.

Emerson hian Real Betis-ah hmun pawimawh a chang pha a, season hnuhnung pahniha La Liga ringawta a khelh zat belhkhawm khi match 37 a ni.