Celtics hnehin Nets an tlang

Brooklyn Nets chuan nimin zing khan Boston Celtics lakah 123-109 in hnehna an chang a, best of seven series chu 4-1 a lain Eastern Conference semifinal an lut fel der.

Nets tan James Harden-a’n a theihna a pho chhuak - 34 point, 10 assist leh 10 rebound neiin, Nets player zinga playoff china triple-double nei thei 11-na a ni nghal chiah bawk.

Harden bakah point 25 neitu
Kyrie Irving leh Kevin Durant (24 points) te an khel ṭha thei hle a, player pathum hian 2014 hnua a vawi khat nan Nets chu conference semifinal an hruai thleng.

Eastern Conference-ah Nets hian Milwaukee Bucks an hmachhawn dawn, regular season hmangṭha leh playoff chinah pawh team ṭha pahnih an nih avangin an inkhel hi a hmuhnawm dawn.

Harden chuan, “Team ṭha tak kan ni a, player dangte an thiam hlawm em avangin inkhelh pawh a nuam. Basket venhim lamah hma kan sawn zel a nih phei chuan sang tak kan thlen theih ka beisei,” tiin a sawi.

Nets leh Bucks an tlang tawh a, champion lai Los Angeles Lakers erawh puanthuah tel thut thei reng an ni ta. Game 5 inkhelah Lakers hian hliam vangin Anthony Davis an chhawr thei lo a, Phoenix Suns lakah 115-85 in an chak lo.

Suns hian series-ah 3-2 in hma an hruai ta a, tlang turin vawi khat chak chauh an mamawh tawh - Lakers tan erawh khelh hmabak pahnih la awmah chak ve ve a ngai tawh dawn. Zirtawpni zing dar 8:00-ah game 6 an khel ang.

Lakers thiampuipa LeBron James chuan, “A nihna takah chuan an duhtawkin min sawp a ni ber, hmasawnna tur leh siamṭhat ngai lai a tam hle. Game 6-ah chuan kan theihna sang ber kan hman chhuah ngei ngei a ngai dawn,” tiin a sawi.